Azərbaycan futbolunun tarixində iz buraxan, hətta əfsanə sayıla biləcək adamlardan biri də Mahmud Qurbanovdu.

O, fərqli klublarla ən çox - 6 dəfə çempion olan futbolçudu. Amma “professor” ləqəbli futbolçu uzun müddətdi işsizdi. Mütəxəssislə söhbətlə ölkə futbolu ilə bağlı bəzi məqamlara toxunduq.

- Uzun müddətdi işsizsiz. Bunun səbəbi nədi? Mahmud Qurbanovun bu qədər vaxt ərzində heç bir yerdə çalışmaması anormal deyil? Bir müddət məşqçi axtaran ikinci liqa təmsilçisi “Şəmkir”dən sizə təklif olubmu?
- Mənə heç bir klubdan təklif gəlməyib. Nə premyer-liqa, nə 1-ci liqa, nə də 2-ci liqa klublarından. Heç bir klub rəsmisi ilə görüşməmişəm. Üç ildi futboldan kənardayam. Səbəbini bilmirəm. Əslində əvvəllər bəzi futbol adamları “Səbail”dəki uğursuzluğu səbəb göstərirdi, işsizliyimi bununla bağlayırdılar. Amma bizim futbolda uğurlu-uğursuz olmaq söhbəti deyil, adam lazımdı. Adamın olsa, işləyəcəksən. Uğursuz olmağım əvvəl önə çəkilirdi. Bəzi məşqçilərə baxsaq, görərik ki, uğursuz da olsa, işləyirlər, iş başındadılar. Bu ehtimalı qəbul etmirəm. “Neftçi-2”də cavanlarla çempion olmağımı heç kim yada salmır. Bilmirəm səbəb nədi. Mənim üçün müəmmalı deyil, təəccüblüdü ki, niyə belədi. Bilmirəm bu hardan gəlir.

- Sonuncu komandanız “Səbail”in oyunlarını izləməyə vaxtınız olurmu? Ümumiyyətlə, “Şəfa” ilə aradakı xal fərqini nəzərə alsaq, “dənizçilər”in elitaya qayıtması nə dərəcədə realdı?
- Açığı, “Səbail”in oyunlarını izləmirəm. Nə yalan deyim... Bildiyim qədəri ilə birinci liqada nəticələri yaxşıdı.

- Ölkə çempionatının səviyyəsindən, oyunların tempindən razısızmı? Premyer-liqa sizin dövrünüzlə müqayisədə çoxmu dəyişib? Futbol ictimaiyyəti arasında belə fikir hökm sürür ki, “Sabah” bu mövsüm, nəhayət, “Qarabağ”ın hegemonluğuna son qoyacaq. Bu iki komandanın heyətlərini, gücünü müqayisə etmək olarmı?
- Çempionat maraqlı keçir. Mövsümün ilk yarısında yaxşı oyunların, baxımlı qolların şahidi olduq. “Qarabağ”la rəqabət aparan komandanı da gördük. Bu, “Sabah” oldu. “Qarabağ”la bərabər mübarizər, rəqabət aparır. Əslində “Sabah”ın nə qədər belə davam edəcəyini proqnozlaşdırmaq çətindi. Maya qədər nə qədər oyun var. “Sabah” bu tempə ayaq çatdıra, sona qədər belə davam edə biləcəkmi - bunu qarşıdakı aylar göstərəcək. Hər halda yaxşı oyun göstərən “Qarabağ”dan sonra bir komanda var, bu da “Sabah”dı.

- Bəs “Neftçi”də çatışmayan nədi? Klubun maliyyə problemi yoxdu, istədiyi futbolçuları ala bilir, amma yenə də nəticə ürəkaçan deyil.
- “Neftçi”də baş məşqçi dəyişikliyi oldu. Yuri Vernidub komandanı iki oyuna çıxardı. İndi bu qış fasiləsində vaxtı oldu ki, komandaya “əl gəzdirsin”, öz təməlini, oyun üslubunu ortaya qoysun. Baxaq, görək ki, çempionatın sonuna qədər “Neftçi”də yaxşıya doğru dəyişiklik olacaq, ya yox. Turnir cədvəlində neçənci yeri tutacağını, nəticədən başqa oyununda inkişaf olub-olmadığını zaman göstərəcək.

- “Kəpəz”dəki vəziyyəti necə dəyərləndirirsiz? Azər Bağırovun “Kəpəz”i elitada qala bilərmi?
- Autsayder komandalardan kimin elitada qalacağını proqnozlaşdırmaq olmur. Bu futboldu. Həm “Karvan-Yevlax”, həm “Qəbələ”, həm də “Kəpəz”, ola bilər ki, qələbələrlə bu zonadan çıxsınlar. Bunu da vaxt göstərəcək. Qış təlim-məşq toplanışından necə istifadə ediblər, necə transferlər ediblər, bundan da çox şey aslı olacaq. İndidən fikir bildirmək düzgün deyil.

- Gənc futbolçulardan bəyəndiyiniz kimlər var? Onlar ölkə futbolunu, xüsusən də milli komandanı gələcəkdə çiyinlərində daşıya biləcəkmi?
- Bir neçə gənc oyunçu var ki, normal oynayırlar. Bəyəndiklərim var. Mən həmişə demişəm ki, “Neftçi”dəki Murad Məmmədov çox istedadlı futbolçudu. “Neftçi”də işləyəndə onu aşağı yaş qruplarında görmüşdüm, istedadına bələd idim. Bu qış təlim-məşq toplanışında da özünü yaxşı tərəfdən göstərdi. Əvvəlki müsahibələrimdə də deyirdim ki, Murada şans vermək lazımdı. Onun mövqeyində oynayan legionerlər heç də Muraddan artıq oynamır. Əksinə, Muradın meydanda göstərdiyi oyun buna əsas verir. Sürətlidi, texnikalıdı, driblinqi yaxşıdı. Keçidlər edir, qol duyumu var. Bu xüsusiyyətlər bu uşaqda varsa, yaşının azlığı maneə olmamalıdı. Oynamalıdı ki, Azərbaycan futbolu yeni oyunçu qazansın.

- Milli komandadan söz düşmüşkən, nəhayət, yerli mütəxəssis “sükan arxasındadı”. Futbol ictimaiyyəti uzun müddət idi bunu tələb edirdi. Siz də tələb edənlər sırasındaydız?
- Mən də onun tərəfdarı olmuşam ki, millidə yerli məşqçi olsun. Futbolçuların xarakterinə daha çox bələddi. Yerli baş məşqçinin olması o deməkdi ki, yığmamız oyunlara mübariz əhval-ruhiyyədə çıxacaq. Bu baxımdan yaxşıdı.

- Ayxan Abbasovun yaxın və uzaq gələcək üçün hədəfləri nə olmalıdı? Onun əlinin altında vəziyyəti radikal şəkildə dəyişmək üçün yetərincə resurs varmı?
- Ayxan Abbasovun seçim imkanı geniş deyil. Limit məsələsi var. Ayxan Abbasov üçün geniş seçim, heyət yoxdu. Oyun praktikası olmayan futbolçuları milliyə çağıra bilmir. Belə futbolçular azdı. Reallıq budu. Ayxan Abbasov çıxış yollarını axtarıb tapar. Düzdü, çox çətindi. Keyfiyyət baxımdan seçimi çox azdı. Amma yerli məşqçidi. Futbolumuz üçün bugünkü gündə ən ideal variantdı.

MÜZƏFFƏR QULUZADƏ