“Futbol+”in ilin futbolçusunu müəyyənləşdirmək üçün keçirdiyi sorğuda respondentlərə təqdim olunan siyahıda Rüfət Abbasovun da adı var idi. Və “Şamaxı”nın müdafiəçisi yetərincə yüksək nəticə göstərdi: 46 xal toplamaqla 6-cı yeri tutdu. “Neftçi”nin yetirməsi olan futbolçu “Şamaxı”da parlayıb və indi ildən-ilə “artırır”.

Yeri gəlmişkən, Rüfət yanvarın 1-də 21 yaşını tamamladı. Onunla söhbətdə bəzi suallara cavab tapmağa çalışdıq.

- 21 yaşın tamam oldu. Avropa standartları ilə baxsaq, yavaş-yavaş “gənc futbolçu” statusundan çıxırsan. Bu da məsuliyyətin artması deməkdi. Bu yaşda səndən nə uğur gözləyək? Konkret planların var?
- Bəli, 21 yaşım oldu. Mən həmişə öz üzərimdə işləyirəm. Yaşım artdıqca məsuliyyətim də artır. Zəif cəhətlərimin üzərində işləyib, daha da yaxşı olmaq istəyirəm.

- “Futbol+”in sorğusunda 6-cı pillədə qərarlaşdın. Elə də pis nəticə deyil. Qarşıdakı illərdə ən yaxşı olmaq kimi hədəfin var?
- 6-cı yeri tutsam da, hədəfim ən yaxşı olmaqdı. Bunun üçün daha çox çalışmalıyam. Əlimdən gələni edəcəm ki, növbəti mövsümlərdə daha yaxşısını edim, hamıdan yaxşı olum.

- Elvin Cəfərquliyev ilin ən yaxşı futbolçusu seçildi. O da əvəzedici komandada Ayxan Abbasovun əlinin altında “bişdi”, inkişaf etdi, hazırda ölkənin ən yaxşı futbolçusudu. Özünü Elvinə oxşadırsan? Daha doğrusu, oxşarlıq hiss edirsən? Oyun üslubu, mövqenin eyni olması baxımından...
- Oxşatmaq deməzdim. Özümü kiməsə oxşatmağı düzgün saymıram. Mövqeyimiz eynidi və hər ikimiz Ayxan Abbasovun rəhbərliyi altında parladıq. Ayxan müəllimə təşəkkür edirəm ki, mənə güvəndi, inandı. Bundan sonra etməli olduğum odu ki, maksimum dərəcədə çalışım və istər öz komandamda, istərsə də millidə özümü ən yaxşı tərəfdən göstərim.

- Bir az əvvələ qayıdaq. “Neftçi-2”nin əvəzedilməz futbolçularındandınn. Birdən “Şamaxı”dan təklif gəlir və sən də qəbul edirsən. Bu qərarı doğru sayırsan?
- “Neftçi” ilə müqaviləmin müddəti bitmişdi. “Şamaxı”dan təklif gəldi. Ayxan müəllimlə söhbət etdik, mənə inandığını, güvəndiyini bildirdi. Bir daha ona təşəkkür edirəm. Bəli, doğru qərar vermişəm.

- Artıq püxtəşəlmisən. Əsas milliyə də çağrılmısan, start heyətində meydanda olmusan. “Neftçi”dən, ya da başqa komandadan sənə təklif gəlib? Gəlsə, qərarın necə olar?
- Mənə heç bir klubdan təklif gəlməyib. “Şamaxı” ilə müqaviləm var, bütün fikrimi bu komandaya yönəltmişəm.

- Ötən mövsüm əsas zəif cəhətin hava ötürmələrinin uğursuz olması idi. Mövsümün gedişində bunu da düzəltdin. Məhz bu nüansı fərdi şəkildə məşq etdin, yoxsa komanda məşqində düzəldi?
- Zəif cəhətlərimi görürəm. Hər dəfə istəyirəm ki, daha da yaxşılaşdırım. Şükürlər olsun, bu mövsüm də məhsuldar ötürmələr verirəm. Bunları həm fərdi, həm də komanda məşqində işləyirik.

- Cari mövsümlə bağlı gözləntin nədi? “Şamaxı”nın hədəfi yenə də elitada qalmaqdı?
- Mövsüm başlayanda hədəfimiz elitada qalmaq idi. Bunun üçün mübarizə aparırıq. Lakin bu o demək deyil ki, son pillələrdə qərarlaşmalıyıq. Bacardığımız qədər maksimum yüksəlsək, mövsümü yaxşı adlandırmaq olar. Bunun davamını gətirmək istəyirik. Hər oyuna qələbə üçün çıxırıq.

- Kumirin kimdi?
- Roberto Karlos.

MÜZƏFFƏR QULUZADƏ