İnanmıram ki, dünyanın hansısa ən geridəqalmış ölkəsində belə bu cür hadisə yaşanar. Amma bizdə oldu.

Baş məşqçini yola salmadan onun yerinə adam gətirdilər və həmin o yeni məşqçi meydana komanda çıxardı, futbolçulara göstəriş verdi. Hətta oyundan sonra mətbuat konfransında da iştirak etdi. Mənim Füzuli Məmmədova böyük hörmətim var. Zamanında birlikdə efirə də çıxmışıq, futbolu müzakirə etmişik. Onun dəyərli fikirlərinə qatılmışam, bir çox məsələlərdə eyni mövqedən çıxış etmişik. Amma son yaşananlara görə mən Füzuli bəyə heç cür haqq qazandıra bilmərəm. Gərək özü də bu işə qol qoymayaydı, “Karvan-Yevlax”ın rəhbərliyinin Azər Həşimovu sivil qaydada, peşəkarlığa sığan şəkildə yola salmasını gözləyəydi. Di gəl ki, gözləməyib, yaxud da buna səbri çatmayıb.

İndiyə qədər cübəcür qəribə olaylarla qarşılaşmışıq. Samir Abasovun “Sumqayıt”ın baş məşqçisi ola-ola “Neftçi”yə gəlmək üçün gün saydığını belə görmüşük. Lakin beləsi olmamışdı, bunu da bizə göstərdilər. Allah Azərbaycan futbolunu daha böyük biabırçılıqlardan qorusun. Məlum məsələdi ki, Həşimov da Samir Abasov kimi təzminatını tələb etdiyinə görə “Karvan-Yevlax” onunla yolları rəsmən ayıra bilmir. Hələ yaxşı ki, adamı hədələyib, döyə-döyə istefa ərizəsi yazmağa məcbut etmirlər. Deyəsən, bu gedişlə həmin günlər də uzaqda deyil. Dünya futbolunda “ilklərə” imza atmağa” davam edəcəyik. “Karvan-Yevlax”ın “Qarabağ”la oyununda diqqətimi çəkən təkcə Füzuli Məmmədov olmadı. Ramil Şeydayevi də uzun müddətdən sonra iş başında, topun arxasında qaçan, qol vurmağa çalışan gördüm. Qurban Qurbanov əsas heyətə düşməyə çətinlik çəkən bir sıra futbolçularla yanaşı, Ramil Şeydayevə də şans vermişdi. Rəqib turnir cədvəlinin sonuncusu, həvəskar səviyyəli “Karvan-Yevlax” olduğundan, Qurban bəyin bu addımı anlaşılandı. Hər kəs “Qarabağ”ın ehtiyat qüvvəsinin hansı vəziyyətdə olduğunu görəcəkdi. Gördük də. Bir şeyə əmin olduq ki, Ramil Şeydayev futbolçu kimi yaxşı günlərini xeyli arxada qoyub. Adamın meydanda qaçmağa halı, topa qüvvətli zərbə vurmağa gücü yoxdu. Bir az çevik hərəkət edən kimi yorulur, həlledici məqamlarda topa məktəblilər sayağı zərbə vururdu. Çətin ki, “Qarabağ”dan sonra hardasa ona bu şansı verələr. Təklif edirəm ki, Ramil qazandığı pullardan yeməyinə də bir az xərcləsin, güc toplasın. Yoxsa meydandakı görüntüsü heç də ürəkaçan deyil. Sanki ona yemək vermirlər.

Heç şübhəsiz, turun ən baxımlı oyunlarından biri Şamaxıda yerli komandanın “Sumqayıt”la qarşılaşması idi. Qonaqlar əzmkar qələbə qazandılar, futbolda sona qədər mübarizə aparmağın nə qədər vacib olduğunu göstərdilər. Təəssüf ki, Ramalinqomun “Sumqayıt”a qələbə gətirən qolundan sonra Saşa İliç emosiyalarını cilovlaya bilmədi və Ayxan Abbasova münasibətdə qeyri-etik jest edib, öz dilində nələrsə söylədi. Serbiyalı mütəxəssisin sonradan səhvini anlamasını, üzrxahlıq etməsini alqışlayıram. Amma içimizdəki İliçdən daha çox serb olanlar onun müdafiəçisinə çevrilib, məşqçinin hərəkətlərində tərbiyyəsizlik olmadığını düşünürlər. Adam özünü günahkar bilir, bizimkilərsə yox. Təsəvvür edə bilmirəm ki, bir azərbaycanlı məşqçi gedib Serbiyada bu hərəkəti yerli mütəxəssisə, özü də milli komandanı çalışdıran birinə qarşı edə bilər. “Sumqayıt”ın prezidenti Riad Rəfiyev hər nə qədər Ayxan Abbasovdan acıqlı olsa da, İliçi tənbeh etməli, belə davranışa son qoymağı tələb etməlidir. Abbasov bizdən biridi, onu tənqid də edərik, tərif də. Lakin bir serb məşqçinin gəlib ona hücum etməsinə göz yuma bilmərik. Bunu unutmayın.

AMAL