Xəbər verdiyimiz kimi, “Karvan-Yevlax” dünən iki futbolçu ilə yollarını ayırdı. Söhbət Rəhman Şabanovla Ceyhun Bağırzadədən gedir. Maraqlıdı ki, Yevlax təmsilçisi hələ ötən ay Rəhmanla müqavilənin müddətini uzatdığı haqda məlumat yaymışdı.

Bəs, nə baş verdi? Futbolçu özü komandasını dəyişmək istədi, yoxsa baş məşqçi Azər Həşimov onun xidmətinə ehtiyac duymadı?

Bu suallarla klubun mətbuat xidmətinin rəhbəri Bəhruz Musayevə müraciət etdik. O, “Football-plus.az”a açıqlamasında Rəhmanın özünü daha çox şans qazanacağı komandada sınamaq istədiyini və bu məqsədlə kollektivdən ayrıldığını bildirdi.

Qeyd edək ki, Rəhman karyerasını 1-ci liqa klubu “Zaqatala”da davam etdirəcək. O, yeni kollektiviylə birillik müqavilə imzalayıb. Ceyhun isə karyerasını “Qəbələ” akademiyasında davam etdirəcək.

KƏNAN BAHADIR