Bu həftə Almaniya kubokunda 1/8 final mərhələsinin oyunları keçirildi.

"Football-plus.az" xəbər verir ki, bir sıra maraqlı və sürpriz nəticələr qeydə alındı.

“Bavariya”, təbii ki, Berlin səfərində meydana əsas heyətlə çıxmışdı. Çünki bu mövsüm bütün turnirlərdə Münhen nəhəngindən xal almağı bacaran ilk komanda noyabrın 8-də məhz “Union” olmuşdu (2:2). Bu oyun da məhsuldar alındı. “Union”lu futbolçular 4 qol vursalar da, yekunda məğlubiyyətlə barışmalı oldular. Çünki bunların ikisində avtoqol qeydə alındı! Avstriyalı Kverfeldin penaltilərdən vurduğu qollar komandası üçün kifayət etmədi. Maraqlıdı ki, Noyer peşəkar karyerasında 906-cı rəsmi oyunda ilk dəfə bir matçda bir futbolçudan iki penalti qolu buraxdı! Son iki ildən fərqli “Bavariya” bu dəfə 1/4 finala yüksəlməyi bacardı.

Mərhələnin mərkəzi oyunu Dortmundda keçirildi. Kubokun son qalibi statusunda olan “Bayer-04” mübarizəni davam etdirmək üçün məhz Dortmundu fəth etməliydi. Özü də bu komandalar ötən həftəsonu bundesliqa çərçivəsində Leverkuzendə qarşılaşmış və “Borussiya” 2:1 üstün olmuşdu. Amma bu dəfə “arılar” “sarı divar”ın gözü önündə ümidləri doğrulda bilmədilər. Əlcəzairli Mazanın ilk yarıda vurduğu qol oyunda yeganə oldu. Niko Kovaç 2-ci hissədə Girassi başda olmaqla bütün əsas futbolçuları döyüşə atsa da, vəziyyəti düzəltmək mümkün olmadı. Ötən həftəiçi ÇL-də çətin Mançester səfərindən “quru” qələbə ilə dönən “Bayer-04” bu dəfə Dortmundda qol buraxmadan qalib gəldi. Maraqlıdı ki, ötən mövsüm “aspirinlər” məhz bu mərhələdə Münhendə “Bavariya”nı da minimal hesabla yenmişdilər.

Digər oyunlara gəlincə, “Ştutqart” Bohum səfərində rahat qələbə qazandı. Meydan sahiblərindən Ştrompf həm erkən avtoqolla, həm də ilk yarının sonlarında qırmızı vərəqə almaqla komandasına qənim kəsildi. Yekun nəticəni müəyyənləşdirən Dəniz Undav ardıcıl 6-cı rəsmi oyunda ən azı 1 qolun vurulmasında yaxından iştirak etdi. Bu müddətdə onun hesabında 8 qol, 2 məhsuldar ötürmə var. “Frayburq” və “Leyptsiq” də aşağı liqa təmsilçiləri ilə ev matçlarında asan qələbə qazandılar. Bundesliqada son həftələrdə yüksəlişdə olan Münhenqladbax “Borussiya”sı gözlənilmədən evdə “Sankt Pauli” səddini aşa bilmədi. Elita klubunun 2-ci bundesliqa təmsilçisi ilə bacara bilmədiyi yeganə oyun Hamburqda keçirildi. “Holştayn” əlavə vaxtda hesabda geri düşsə də, özündə güc taparaq həm bərabərlik qolunu vurdu, həm də penalti seriyasında qalib gələrək “Hamburq”u mübarizədən kənarlaşdırdı.

Mərhələnin ən sürpriz nəticəsi Berlində qeydə alındı. Əslində “Herta”nın “Kayzerslautern”i yenməsinin özü sürpriz deyil. Amma 6:1-lik qələbəni az adam proqnozlaşdırardı. 2024-də bu turnirdə finala qədərə irəliləmiş Mahir Emrelinin komandası bu dəfə fanatlarına əsl şok yaşatdı. Xatırladaq ki, Mahir zədə üzündən ilin sonuna qədər oynamayacaq.

1/8 final
Union – Bavariya 2:3
Kverfeld, 40-p.; 58-p. – Ansa, 12-öz qapısına. Keyn, 24. Leyte, 45+4-öz qapısına.
Bavariya: Noyer, Stanişiç, Upamekano, Ta, Laymer (İto, 86), Kimmix, Pavloviç (Qoretska, 49), Olise (Kim Min Ce, 86), Karl (Qnabri, 73), Dias, Keyn.
Borussiya D – Bayer-04 0:1
Maza, 34.
Borussiya: Kobel, Ryuyerson (Girassi, 67), Anton, Əmrə Can, Şlotterbek, Svensson (Bensebayni, 86), Bellingem, Nmeça (Qross, 74), Adeyemi, Çukvuemeka (Bayer, 67), Fabio Silva (Brandt, 67).
Bayer-04: Flekken, Kuansa, Andrix, Tapsoba, A.Qarsiya, Maza, Hofmann (Bade, 90+3), Poku (Tella, 83), Qrimaldo, Terrye (Tillman, 61), Kofane (Şik, 61).

Bohum (D-2) – Ştutqart 0:2
Ştrompf, 12-öz qapısına. Dəniz Undav, 47.
Ştutqart: Bredlou, Assinyon, Yeltş (Sterqiu, 89), Şabo, Hendriks (Narti, 61), Mittelştadt, Karazor, Ştiller (Andres, 76), Əl-Xannus (Fürix, 61), Levelinq (Buanani, 76), Dəniz Undav.

Leyptsiq – Maqdeburq (D-2) 3:1
Nusa, 19. Baumqartner, 29; 54 – Qnaka, 11-p.
Leyptsiq: Vandervoordt, Klostermann (Nedelkoviç, 46), Lukeba, Orban, Raum, Zayvald, Baumqartner (Maksimoviç, 88), Banzuzi (Şlager, 46), Diomande (Qomis, 66), Nusa (Finkqrafe, 82), Harder.

Frayburq – Darmştadt (D-2) 2:0
Qrifo, 42-p. Holer, 69.

Borussiya M – Sankt Pauli 1:2
Tabakoviç, 56 – Kaars, 43. Oppi, 83.

Hamburq – Holştayn (D-2) 1:1, p. - 2:4
Yatta, 107 – Harres, 118.

Herta (D-2) – Kayzerslautern (D-2) 6:1
Şuler, 5; 60. Vinkler, 20. Ayhkorn, 31. Kovnatski, 75. Krattenmaxer, 80 – Ritter, 45+2.