La Liqada hesabat turu lider “Real”lə ən yaxın izləyicisi “Barselona” arasındakı xal fərqinin 1-ə enməsiylə əlamətdar oldu. Liderlər qrupunda qərarlaşan “Vilyarreal” və “Atletiko” da növbəti qələbəsini qazandı.

"Football-plus.az" xəbər verir ki, “Barsa” “Real”dan bir gün əvvəl meydana çıxdı.

Kataloniyalılar, adətən, yığma fasiləsindən sonra çətinlik çəksə də, yenilənmiş “Kamp Nou”ya dönüş onları ruhlandırmalıydı. Flikin komandası “Atletik”lə oyuna çox fəal başladı və artıq 4-cü dəqiqədə hesabı açdı. Levandovskinin qolundan az sonra Lopes də fərqlənə bilərdi, ancaq Simon komandasını xilas etdi. Fasilə ərəfəsində basklar təşəbbüsə yiyələnsə də, şanslardan yararlana bilmədi. Əvəzində “Barsa” 2-ci qolu da vurdu – Yamalın gözəl ötürmə ilə təkbətək çıxardığı Lopesin bu imkanı boşa verməsi günah olardı. “Barsa” 2-ci hissədə də həm əvvəldə, həm də sonda qol vurdu.

Fasilədən dərhal sonra Lopes fərqi darmadağın həddinə çatdırdı, 90 dəqiqənin tamamında isə Yamaldan ötürmə alan Torres dublu rəsmiləşdirdi. Hərçənd bu oyunda hər şey artıq 54-cü dəqiqədə - Sanset birbaşa qırmızı vərəqə ilə meydandan qovulanda aydın idi. Düzdü, “Atletik”in 0:4-ü haqq etdiyini də demək çətindi. “Quru” hesablı qələbə qazanan “Barsa” “Çelsi” ilə ÇL oyununa yaxşı əhval-ruhiyyədə yollanacaq. Ernesto Valverde isə komandasını bu vəziyyətdən çıxarmağın yollarını tapmalıdı. “Atletik” artıq 8-ci pilləyə yuvarlanıb.

Xabi Alonso “Elçe” ilə səfər oyununda həm heyət, həm də taktiki sxem ilə bağlı eksperimentlər etdi, Valverde, Kamavinqa, Vinisius kimi usta oyunçuları ehtiyatda saxladı. Bu gediş yaxşı nəticə vermədi. “Elçe” ilk yarıda heç də “Real”dan pis təsir bağışlamadı. Penya və Kurtua fasiləyə qədər iki seyvlə yadda qaldı, yəni hesab 2:2 ola bilərdi, ancaq komandalar paltardəyişmə otağına 0:0 ilə yollandı. Oyun canlanan kimi meydan sahibləri hesabı açdı.

“Elçe”nin xavbeki Febas fərqlənəndən az sonra Alonso meydana üç əsas oyunçusunu buraxdı. “Real”ın oyununda hərəkətlilik artdı, madridlilər təşəbbüsü ələ aldı, bununla belə, onların dominantlığından danışmaq olmaz. “Real”ın 8-ci künc zərbəsi bərabərlik qolunu gətirdi – Aleksander-Arnoldla Bellingem Höysenin fərqlənməsinə şərait yaratdı. Ancaq qonaqların qol sevinci uzun sürmədi. Eder Sarabiya 79-cu dəqiqədə “Real”ın sabiq oyunçusu Rodrigesi meydana buraxdı. O isə 5 dəqiqə sonra “Elçe”ni növbəti dəfə irəli çıxardı. Amma tezliklə “Real” da bərabərlik qolunu vurdu. Penya Bellingemin ilk zərbəsini qaytarsa da, Mbappe topu yenidən ingiltərəli ulduza qaytardı, o da ikinci şansı boşa vermədi. Düzdü, bu zaman Vinisius qapıçıya qarşı kobud oynamışdı, yəni qol sayılmaya da bilərdi. Ardıcıl 2-ci oyunda heç-heçəyə razılaşan “Real” artıq “Barsa”nın isti nəfəsini kürəyində hiss edir.

“Barsa” isə “Vilyarreal”dan cəmi 2 xal öndədi. “Sarı sualtı qayıq” autsayderlərdən “Malyorka”nın müqavimətini yalnız 83-cü dəqiqədə qıra bildi. 4-cü pillədə isə “Atletiko” qərarlaşıb. “Hindular” “Xetafe” ilə səfər oyununun 82-ci dəqiqəsində avtoqola sevindi. Onların bütün turnirləri əhatə edən qələbə seriyası 5 oyuna çatdı. Bu qələbələrdən dördü La Liqanın, biri isə ÇL-in payına düşür.

Mövsümün əvvəlini boşa verən “Real Sosyedad” tədricən vəziyyəti düzəltməkdədi. Basklar mövsümdəki 4-cü qələbəsini “Osasuna” ilə səfər oyununda qazandı. Hərçənd oyun onlar üçün yaxşı başlamadı. Katena ilk yarıda pamplonalıları irəli çıxardı. “Real Sosyedad” 2-ci hissəyə çox fəal başladı və 6 dəqiqə aralığında iki qol vurdu. Sonradan meydana çıxan Barreneçea 82-ci dəqiqədə oyunda son nöqtəni qoydu – 1:3.

Turun qalan oyunlarına gəlincə, “Valensiya” “Levante”ni, “Selta” “Alaves”i yeganə qolla məğlub etdi. “Ovyedo” – “Rayo Valyekano”, “Betis” – “Jirona” oyunları heç-heçə bitdi.

13-cü tur
Barselona – Atletik 4:0
Levandovski, 4. Torres, 45+3; 90. Lopes, 48. (45157)
Barselona: X.Qarsiya, Kunde, Kubarsi, E.Qarsiya (Bernal, 74), Martin, Lopes (Kasado, 64), Olmo (Rafinya, 81), Torres, Yamal, Balde (Arauxo, 46), Levandovski (Fernandes, 64).

Elçe – Real 2:2
Febas, 53. Rodriges, 84 – Höysen, 78. Bellingem, 87. (31024)
Real: Kurtua, Karreras (Dias, 88), Höysen, Asensio, Sebalyos (Kamavinqa, 57), Gülər (Q.Qarsiya, 64), Aleksander-Arnold, F.Qarsiya (Valverde, 57), Bellingem, Mbappe, Rodriqo (Vinisius, 57).

Xetafe – Atletiko 0:1
Duarte, 82-öz qapısına. (9783)
Atletiko: Musso, Ruceri (Qallaher, 69), Lanqle, Ximenes, Lyorente (Qrizmann, 14), Koke (Sörlot, 59), Barrios, Molina, Qonsales (Hantsko, 69), Baena, Alvares (Raspadori, 59).

Vilyarreal – Malyorka 2:1
Moreno, 6. Oluvaseyi, 83 – Koşta, 8. (16854)

Osasuna – Real Sosyedad 1:3
Katena, 42 – Mendes, 53. Qedeş, 59. Barreneçea, 82. (21377)

Valensiya – Levante 1:0
Duro, 79. (46302)

Alaves – Selta 0:1
Aspas, 55-p. (16582)

Ovyedo – Rayo Valyekano 0:0
(23684)

Betis – Jirona 1:1
Qomes, 75 – Vanat, 20. (64268)

Espanyol – Sevilya 2:1
Milya, 48. Fernandes, 84 – Markao, 86.

1. Real 13 10 2 1 28-12 32
2. Barselona 13 10 1 2 36-15 31
3. Vilyarreal 13 9 2 2 26-11 29
4. Atletiko 13 8 4 1 25-11 28
5. Betis 13 5 6 2 20-14 21
6. Espanyol 13 6 3 4 17-16 21
7. Xetafe 13 5 2 6 12-15 17
8. Atletik 13 5 2 6 12-17 17
9. Real Sosyedad 13 4 4 5 17-18 16
10. Elçe 13 3 7 3 15-16 16
11. Sevilya 13 5 1 7 19-21 16
12. Selta 13 3 7 3 16-18 16
13. Rayo Valyekano 13 4 4 5 12-14 16
14. Alaves 13 4 3 6 11-12 15
15. Valensiya 13 3 4 6 12-21 13
16. Malyorka 13 3 3 7 13-20 12
17. Osasuna 13 3 2 8 10-16 11
18. Jirona 13 2 5 6 12-25 11
19. Levante 13 2 3 8 16-24 9
20. Ovyedo 13 2 3 8 7-20 9

Bombardirlər: Mbappe (Real) - 13, Levandovski (Barselona) – 8, Alvares (Atletiko), Torres (Barselona) – 7.

Növbəti turun oyunları noyabrın 28-i – dekabrın 1-i aralığında keçiriləcək: Xetafe – Elçe, Malyorka – Osasuna, Barselona – Alaves, Levante – Atletik, Atletiko – Ovyedo, Real Sosyedad – Vilyarreal, Sevilya – Betis, Selta – Espanyol, Jirona – Real, Rayo Valyekano – Valensiya.

Turun rəqəmi
700 – 2009-un sentyabrından “Atletiko”nun şərəfini qoruyan Koke oyun sayını bu həddə çatdırmaqla klubun rekordçusu oldu. O, bu oyunların 662-nə Dieqo Simeonenin rəhbərliyi altında çıxıb. Koke 48 qol və 114 məhsuldar ötürmə ilə yadda qalıb, 416 qələbə, 150 heç-heçə, 134 məğlubiyyət yaşayıb.

Turun ulduzu
Lamin Yamal (Barselona) – kataloniyalıların heyətindən bir çox futbolçunu fərqləndirmək olar. Məsələn, Erik Qarsiya iki dəfə topu aldı və həmin hücumlar qolla nəticələndi. Ancaq biz Yamalı seçdik. Laminin iki gözəl ötürməsi Torresin dubluna şərait yaratdı. O özü də qola çox yaxın idi, ancaq imkanları qaçırdı.

Turun sitatı
Dieqo Simeone, “Atletiko”nun baş məşqçisi (Duartenin avtoqoluna işarə ilə):

Faktlar
* “Barselona” sentyabrın 21-dən bəri ilk dəfə qapısını toxunulmaz saxladı. Kataloniya nəhəngi buna qədər müxtəlif turnirlər çərçivəsindəki ardıcıl 10 oyunda qol buraxmışdı.
* Flikin rəhbərliyi altında 77-ci oyununu keçirən “Barselona” bunların 27-də böyükhesablı qələbə qazanıb. Almaniyalı mütəxəssisin 2024-ün yayında bu komandanın “sükanı arxasına” keçdiyini və artıq bir dəfə çempion etdiyini də xatırladaq.

Oyundan sonra
Hans-Diter Flik, “Barselona”nın baş məşqçisi:
Xabi Alonso, “Real”ın baş məşqçisi: