Avropa Liqasında əsas mərhələnin 4-cü turunda ''Fənərbaxça''nın Plzen ''Viktoriya''sı ilə keçirdiyi səfər matçına (0:0) tribunada açılan pankart damğa vurmuşdu.

"Football-plus.az" xəbər verir ki, yerli fanatlar üzərində ''Vojna S Turkem musi bejt'' (Türklərlə müharibə olmalıdı) ifadəsi yazılmış nəhəng bir pankart açmışdılar. ''Viktoriya''nın baş məşqçisi bunun sadəcə kitabdan bir sitat olduğunu bildirərək ortada ciddi bir şeyin olmadığını bildirmişdi. Amma ''Fənərbaxça'' bu pankarta görə ''Viktoriya''dan UEFA-ya şikayət etmişdi.

Bu qurumun bu şikayətə reaksiyası onu göstərir ki, bu, heç də üstündən elə-belə otüləcək məsələ deyil. Belə ki, UEFA-nın Etika və İntizam Komitəsi bu ifadənin irqçi xarakter daşıdığına qərar verib. Bu üzdən ''Viktoriya''ya 15 min avro cəza verilib. Bundan başqa Plzen klubunun növbəti ev oyununda həmin tribuna qismən bağlanacaq. Ancaq ''Fənərbaxça'' daha böyük cəza ilə üzləşib.

Fanatların bəzi nifrət şüarları üzündən kluba 15 min avro cəza verilib. Eləcə də fanatların stadiona ziyan vurması (15 min avro), tribunada petard yandırmaları (15 min avro) və meydana yad cisimlər atmaları (25 min avro) da istanbullulara baha başa gəlib. Kluba ümumilikdə 78 min avro cəza verilib. Ən əsası növbəti səfər oyununda ''Fənər'' fanatlarına bilet satılmayacaq. Amma bu cəza hələlik şərti xarakter daşıyır.

''Fənər''lilər iki il ərzində səfər oyunlarında xüsusi nəzarət altında olacaq. Onlar yenidən hər hansı bir qalmaqala səbəb olsalar, cəza dərhal qüvvəyə minəcək.