Spalletti yenidən iş başında! - “Yuventus”u xilas etməyə çalışacaq
Luçano Spalletti müəyyən fasilədən sonra yenidən iş başındadı. 66 yaşlı mütəxəssis s“Yuventus”la cari mövsümün sonuna qədər müqavilə imzalayıb
"Football-plus.az" xəbər verir ki, Turin nəhəngi Çempionlar Liqasına vəsiqə qazanarsa, müqavilə müddəti avtomatik uzadılacaq.
Xatırladaq ki, “Yuventus” yaxınlarda, daha dəqiqi, oktyabrın 27-də martdan bəri “sükan arxasında” olan İqor Tudoru istefaya göndərib. 47 yaşlı mütəxəssis əslində işə pis başlamamışdı – komanda onun rəhbərliyi altında A seriyasında 4-cü yeri tutmaqla ÇL-ə vəsiqə qazanmışdı.
Ancaq yeni mövsümdə nəticələr pisləşdi. Bütün turnirləri əhatə edən 8 oyunluq qələbəsiz seriyadan sonra klub rəhbərliyi Tudorla vidalaşmağa qərar verdi. Xorvatiyalı mütəxəssis ayrılanda komanda A seriyasında 8-ci yerdə, ÇL-də isə ilk “24-lük”dən kənarda idi. Odu ki, Spallettinin görməli olduğu iş çoxdu.
İtaliyalı mütəxəssis belə hesab edir ki, Tudor köhnə iş yerində yaxşı çalışıb. Luçano bugünlərdə “Sky Sport”un efirində həmkarının ünvanına tərif yağdırmışdı:
“Yuve” haqqında nəsə deməliyəmsə, onda Tudorun xeyrinə danışacam. O, dəyərlərə söykənən əsl kişi və ciddi adamdı. Onun necə çalışdığını görmüşəm, hər şeyə təsir edə bilən nüfuzlu adamdı. Onu əvəz edəcək adam xoşbəxt olacaq. Tudora görə təəssüflənirəm. Amma bu posta kim gəlir-gəlsin, əlinin altında hazır komanda olacaq”.
Spalletti A seriyasında 30 illik məşqçi karyerası ərzində artıq 8-ci komandanı çalışdıracaq. O, əvvəllər “Empoli”, “Sampdoriya”, “Venetsiya”, “Udineze”, “Roma”, “İnter” və “Napoli”nin “sükanı arxasında” olub. Düzdü, Luçanonun uğur siyahısı o qədər də geniş deyil. Yalnız “Empoli” (bu komandanı C seriyasından A seriyasına çıxarıb), “Roma” (iki İtaliya kuboku və Superkubok) və “Napoli” karyerası parlaq alınıb. Spalletti Neapol klubu ilə 2022/23 mövsümündə ilk dəfə İtaliya çempionu olub. Bu olayın şərəfinə hətta cənub klubunun gerbini qoluna döydürüb. Yəqin ki, Turin tifozisini qıcıqlandıracaq məqamdı.
Bundan başqa, Spalletti iki il də İtaliya yığmasına rəhbərlik edib. Artıq “Yuventus”la da anlaşdığından onun bu ölkədə futbolun bütün yollarından keçdiyini demək olar. Yeri gəlmişkən, onun adı 2023-cü ildə İtaliya futbolunun Şöhrət zalına da salınıb.
Spallettinin İtaliya hüdudlarından kənarda çalışdırdığı yeganə klub isə “Zenit”di. O, peterburqlularla iki dəfə Rusiya çempionu olub, həmçinin bu ölkənin kubokunu və Superkubokunu qazanıb.
Digər xəbərlər
