Kriştiano Ronaldo dünya idmanı tarixinə ilk milyarder futbolçu kimi düşüb. Amerikanın “Bloomberg” şirkəti onun sərvətini 1,4 milyard dollar həcmində qiymətləndirib. Portuqaliyalı ulduz uzun müddət ərzində reklamlardan və şəxsi brendlərindən milyonlar qazanıb, ancaq məhz “Əl-Nəssr” ilə müqavilə milyard həddini keçməyə də imkan verdi.

40 yaşlı hücumçu bu yay Səudiyyə Ərəbistanı klubu ilə müqavilənin müddətini ikiilliyə uzatdı. Adı çəkilən qaynaq bildirir ki, sövdələşmənin dəyəri 400 milyon dollardan artıqdı. Kriştiano ilinə təxminən 200 milyon alacaq, imzapulu isə 30 milyona yaxın olub.

“Bloomberg”in hesablamasına görə, Ronaldo 2002-23-cü illər aralığında futbol müqavilələri əsasında 550 milyon dollardan artıq qazanıb – bu yalnız əməkhaqqıdı, reklam gəlirlərini əhatə etmir. “Armani” və “Castrol” kimi brendlərlə müqavilələri, həmçinin “Nike” şirkəti ilə olan, portuqaliyalı ulduza ildə 18 milyon dollar qazandıran onillik müqaviləni də unutmayaq.

Futbolçu şəxsi layihələrini də inkişaf etdirir: CR7 brendi altında “Pestana CR7 Hotels” (Portuqaliyanın “Restana” qrupu ilə birgə) otellər şəbəkəsi və “CR7 Fitness” fitnes mərkəzləri də fəaliyyət göstərir. Ronaldo biznes imperiyası qurmur, sadəcə, ona maraqlı gələn hər işə pul qoyur: padel-kortlara maliyyə ayırır, geyim, ayaqqabı, alt paltarı, parfüm və aksessuar istehsalına da maraq göstərir.

Kriştiano ötən il İspaniyanın farfor istehsal edən şirkətinə də investisiya yatırıb. “Bloomberg” futbolçunun biznes aktivlərinə 300 milyon dollardan artıq dəyər qoyub. Yazıda o da qeyd olunur ki, Ronaldo indi maliyyə planında sərvəti 600 milyon qiymətləndirilən Lionel Messini önəmli dərəcədə arxada qoyur.

Ronaldo milyard dollar həddinə çatan ilk futbolçu olsa da, ilk idmançı deyil. Ona qədər artıq Maykl Cordan (3,8 milyard) və Rocer Federer (1,3 milyard) də zənginlər siyahısına düşüb.

“Bloomberg” qeyd edir ki, məhz “Əl-Nəssr” ilə müqavilə Krişi milyarderlər siyahısına salıb. Səudiyyə Ərəbistanı klubları indi nəhəng pullar xərcləyirlər və bunu gizlətməyə də çalışmırlar. “FootyStats”ın hesablamasına görə, liqanın ən yüksək ödənişli futbolçuları siyahısında Kərim Benzema, Nqolo Kante və Sadio Mane də var.

Səudiyyə Ərəbistanı çempionatının ən yüksək ödənişli oyunçuları

oyunçu klub illik maaş (avro ilə)
1. Kriştiano Ronaldo Əl-Nəssr 200 000 000
2. Kərim Benzema Əl-İttihad 101 280 000
3. Riyad Mahrez Əl-Əhli 52 200 000
4. Sadio Mane Əl-Nəssr 40 000 000
5. Kalidu Kulibali Əl-Hilal 34 700 000
6. Ayvan Touni Əl-Əhli 31 840 000
7. Nqolo Kante Əl-İttihad 25 320 000
8. Sergey Milinkoviç-Saviç Əl-Hilal 25 000 000
9. Aleksandar Mitroviç Əl-Hilal 25 000 000
10. Marselo Brozoviç Əl-Nəssr 24 200 000