Paris dünyanın ən məşhur, adı məhəbbət və romantika ilə yanaşı çəkilən, sevgili cütlüklərin ən çox üz tutduğu şəhərlərindən biridi.

Bəs, səfər növbəti faciəvi və biabırçı top fərqiylə yadda qalacaq, yoxsa hansısa möcüzəyə şahidlik edəcəyimiz matça? Bunu hələ bilməsək də, dəqiq olan məqam var: yığmamızı böyükhesablı məğlubiyyətdən ancaq möcüzə xilas edə bilər.

Əlbəttə, bu sözləri nə dilə gətirmək asandı, nə də qələmə almaq. Sadəcə, qürur və milli kimliyin bizi reallıqdan qaçmağa məcbur etməsinə imkan verməməliyik. Necə deyərlər, olanla ölənə çarə yoxdu. Odu ki, keçək mətləbə...

DÇ-2026-nın seçmə oyunu
Fransa – Azərbaycan 3:0
Kilian Mbappe, 45+2. Adrian Rabyo, 69. Floryan Tauvin, 84.
10 oktyabr. Paris, “Park De Prens”. Saat 22.45.

Əlbəttə, Azərbaycanın futbol ictimaiyyətinin Fransa ilə oyuna niyə belə həssas və ümidsiz yanaşdığı hər kəsə məlumdu. Unudulmaz “Oser faciəsi”ndən hamı xəbərdardı, bununla bağlı əfsanələr və lətifələr dolaşır. Zarafat deyil, düz 30 il əvvəl – 1995-ci ildə Avropa çempionatının seçmə mərhələsi çərçivəsində keçirilən Fransa – Azərbaycan matçında buraxdığımız 10 cavabsız qol hələ də boğazdan keçmir. Biz bu rəqibin qapısına nə həmin matçda yol tapa bilmişik, nə də 1994-cü ildə eyni turnirin Trabzonda keçirilən oyununda. Beləliklə, millimiz tarixində üçüncü dəfə Fransa yığması ilə qarşııaşacaq. Söhbət FİFA reytinqində 2-ci pillədə olan, ikiqat dünya, ikiqat Avropa çempionluğu yaşayan, Millətlər Liqasının qalibi olan komandadan gedir. Oyunun 48583 yerlik “Park De Prens” stadionunda keçiriləcəyini nəzərə alsaq, yığma təkcə rəqibin yox, fransalı azarkeşlərin də ciddi təzyiqinə məruz qalacaq.

Təbii ki, xatırladılan uğurlar D qrupundakı rəqiblərimizdən biri olan Fransa millisinin gücü haqda daha çox danışmağın yersiz olduğunu ortaya qoyur. Hər halda, meydan sahibləri liderliyini möhkəmlətmək üçün nə lazımdısa, onu etməyə çalışacaq.

Maraq üçün qeyd edək ki, qrupun digər matçında İslandiya Ukraynanı qəbul edəcək. Həmin oyun da saat 22.45-də start götürəcək.

1. Fransa 2 2 0 0 4-1 6
2. İslandiya 2 1 0 1 6-2 3
3. Ukrayna 2 0 1 1 1-3 1
4. Azərbaycan 2 0 1 1 1-6 1