Fransanın 2-ci divizionunda 33-cü turun oyunları keçirildi.

''Football-plus.az'' xəbər verir ki, məhz bu tur Paris şəhərində rəqabəti yeni səviyyəyə çatdıracaq olay yaşandı. Avropanın ən gözəl şəhərlərindən biri bundan sonra ən yüksək səviyyədə yalnız bir klubla təmsil olunmayacaq.

''Paris'' səfərdə ''Martiq'' ilə 1:1 bərabərə qalsa da, mövsümü ilk iki pillədə bitirməyi rəsmiləşdirdi. Bununla da ''Paris'' 1978/79 mövsümündən bu yana ilk dəfə Liqa-1-ə vəsiqə qazandı. Yəni 46 illik fasilədən sonra elitada ilk dəfə Paris derbisi baş tutacaq. Bu derbinin xüsusilə parisli futbolsevərlərə həm nostalji, həm də həyəcanverici hisslər bəxş edəcəyini proqnozlaşdırmaq olar.

Bu hekayəyə maraq qatan daha bir məqam var. ''Paris'' bir müddət öncə Bernar Arnonun tabeçiliyinə keçmişdi. Fransanın və dünyanın ən zəngin iş adamlarından biri klubu satın almışdı. Arno klubun yeni sahibinə çevrilən kimi ''Paris''i ən azı PSJ qədər böyük kluba çevirmək istədiyini bildirdi və bununla bağlı planlarını dilə gətirdi. Bu hədəf baxımından ilk addım artıq atılıb. Belə ki, ''Paris'' yeni mövsümdən etibarən ev oyunlarını əvvəlki ''Şarleti'' stadionunda yox, ''Stad Jan Buin''də keçirməyə başlayacaq. 20 min azarkeş tutumuna malik olan bu arena isə PSJ-nin ev oyunlarını keçirdiyi ''Park de Prens''in düz yanında yerləşir.

Bu iki stadionun arasında cəmi 193 metr məsafə var. Yəni gələn mövsüm Fransa çempionatında bəlkə də dünyanın ən qısa səfərləri reallaşacaq.