"Turan Tovuz" Misli premyer-liqasının 7-ci tur matçında "Sumqayıt"ın meydanından böyükhesablı qələbəylə ayrıldı - 3:0.
"Football-plus.az" xəbər verir ki, "bozqurd"un baş məşqçisi Kurban Berdıyev oyunsonrası mətbuat konfransında jurnalistlərin suallarını cavabladı.
- Futbolçularımı təbrik edirəm. Qələbəyə layiq oynadılar.
- Komanda liderdi. Ardıcıl böyükhesablı qələbələr qazanır. Yenə də müəyyən tənqidlər var. Buna münasibətiniz necədi?
- Hələ çox çalışmalı olduğumuzu bilirik. Müəyyən çatışmazlıqları aradan qaldırmaq üçün işləyirik.
- Əvəzedici komandanın matçlarını izləyirsiz. Ancaq hələ o kollektivdən kiməsə oyunlarda şans verməmisiz. Bu, nəylə bağlıdı? Orda əsas komandaya layiq olan futbolçu yoxdu?
- Burda rəqabət var. Bəzi futbolçular məşqlərdə iştirak edir. Ancaq matçlarda olmaq üçün rəqabətdə qalib gəlmək lazımdı. Onları əsas heyətə əlavə edəndə ehtiyat oyunçular skamyasında əyləşənləri də nəzərə almalıyıq.
- Növbəti matçda rəqib "Qarabağ"dı. Qarşıdan milli fasilə gəlir. Bu məqam komandanın lehinə olacaq, yoxsa əleyhinə?
- "Qarabağ" istənilən halda "Qarabağ"dı. Onlar Çempionlar Liqasında oynayır. Uğurlara görə Qurban müəllimi təbrik edirəm. Komandasının bütün futbolçuları əsas oyunçu sayılır. Onlara qarşı oyun üçün proqnoz vermək çətindi. Qalan məsələləri zaman göstərəcək.
KƏNAN BAHADIR