Sabah (Bakı) – Sumqayıt 1:1 (1:1)
92. Stas Pokatilov - 5,5
27. Timoteuş Puxaç – 5,5
5. Rəhman Daşdəmirov – 5,5
3. Stiv Solvet – 6,0
80. Akim Zedadka – 5,5
20. Coy-Lens Mikels – 7,0
33. Umarali Raxmonaliyev – 5,5
13. İvan Lepinitsa – 5,5
11. Kahim Parris – 5,0
(8. Ayaz Quliyev, 57) – 5,0
18. Pavol Şafranko (k) – 6,0
21. Velko Simiç – 6,5
(88. Xəyal Əliyev, 70) – 5,0
Ehtiyat oyunçular
55. Nicat Mehbalıyev
72. Rustam Samiqullin
17. Tellur Mütəllimov
10. Anatoli Nuriyev
2. Amin Seydiyev
6. Abdulax Xaybulaev
19. Aron Maluda
53. Andrey Santos
Baş məşqçi: Valdas Dambrauskas
Komandanın ən yaxşısı: Coy-Lens Mikels

1. Mehdi Cənnətov – 5,5
80. Keffel Resende – 5,5
3. Höccət Haqverdi – 5,0
72. Rayan Senhadji – 5,0
25. Abdul Raşid Mumini – 5,5
(14. Pedro Pinto, 70) – 5,0
8. Səbuhi Abdullazadə (k) – 5,5
7. Rüstəm Əhmədzadə - 6,0
(71. Masaki Murata, 83) – qiymətsiz
10. Nikola Ninkoviç – 5,0
(23. Ronaldo Vaskes, 57) – 5,0
19. Roy Kehat – 5,0
11. Aleksa Yankoviç – 5,0
(21. Nihad Əhmədzadə, 70) – 5,0
9. Aleksandr Ramalinqom – 5,5
Ehtiyat oyunçular
22. Xəyal Fərzullayev
56. Aftandil Arixov
75. Nadir Orucov
97. Vüsal Paşayev
Baş məşqçi: Saşa İliç
Komandanın ən yaxşısı: Rüstəm Əhmədzadə

Qollar: C.L.Mikels, 26 (1:0, V.Simiç). R.Əhmədzadə, 35 (1:1).
Vərəqələr: K.Parris, 16 (qeyri-idman hərəkəti). S.Abdullazadə, 11 (qeyri-idman hərəkəti). R.Senhadji, 13 (qeyri-idman hərəkəti). R.Daşdəmirov, 80 (qeyriidman hərəkəti). M.Cənnətov, 90+6 (oyunun bərpasının ləngidilməsi) – sarı.
Hakimlər: ƏLİYAR AĞAYEV, Zeynal Zeynalov, Akif Əmirəli, Emin Əliyev (hamısı Bakı).
VAR hakimi: Nicat İsmayıllı (Bakı).
VAR hakiminin köməkçisi: Pərvin Talıbov (Bakı).
Hakim-inspektor: Ramil Diniyev (Bakı).
AFFA nümayəndəsi: Rüfət Əmirov (Bakı).
28 sentyabr. Bakı. “Bank Respublika Arena”. 711 tamaşaçı (8600 yerlik).
Birinci hissəyə 2, ikinci hissəyə 6 dəqiqə əlavə olunub.
Oyunun qiyməti: 6,5.

Projektorların qəfil sönməsi üzündən təxminən 16 dəqiqə qaranlığa bürünən meydança, narazı azarkeşlər, sayılmayan iki qol, daim sakit təbiətiylə yadda qalsa da, mətbuat konfransında özündən çıxan Valdas Dambrauskas, sarı və qırmızı vərəqə alan məşqçilər və sosial şəbəkələri ağuşuna alan mübahisəli hakim qərarları…

Bizə elə gəlir ki, “Sabah” – “Sumqayıt” matçının uzun müddət xatırlanmalı olmasının əsas səbəbləri məhz bunlardı. Ancaq bütün bunlar meydandakı gərgin mübarizəni və baxımlı hücumları arxa plana ata bilməz. Ona görə ki, qarşılaşmanın qəlbi məhz ot örtüyünün üstündə döyündü. Özü də ilk saniyələrdən!

Bəli-bəli, hələ 1-ci dəqiqədə Höccətin topu itirməsindən faydalanaraq irəli atılan Şafranko hesabı açmağa yaxın idi ki, qeyri-dəqiq zərbə ilə yadda qaldı. O başqa məsələ ki, meydan sahiblərinin cəsarətli çıxışı qonaqları çəkindirmədi. Bunun nəticəsində 15-ci dəqiqədə hücuma keçən “kimyaçılar” rəqibinə qorxulu anlar yaşatdı. Yankoviçin Umaralinin başını gicəlləndirəndən sonra qapı önünə göndərdiyi top Ramalinqoma qismət oldu. Belədə başla bəxtini sınayan madaqaskarlı dirəyi “nişan aldı”.

Növbəti hücumu “Sabah”ın ifasında izlədik. 22-ci dəqiqədə qeydə alınan epizod zamanı Mikels Simiçin cərimə meydançasına göndərdiyi “kürə”ni başla tora qovuşdurmaq istəsə də, məqsədinə çatmadı – top qapıdan yan keçdi. Hər halda, arzusu çin olan komanda “bayquşlar” oldu. Masazır təmsilçisi 26-cı dəqiqədə Simiçin ötürməsi, Mikelsin qapıya zərbəsi sayəsində hesabı açdı. O başqa məsələ ki, “Sumqayıt”ın “cavab atəşi” özünü çox gözlətmədi. Daha doğrusu, qonaqlar Rəhmanın 35-ci dəqiqədə topu itirməsi üzündən sürətlə əks-hücuma keçdi. Burda Yankoviçin uzaqdan önə göndərdiyi topu Solvet qarşılamaq istəyirdi ki, “kürə” onun başla zərbəsindən sonra Rüstəmin önünə düşdü. Belədə dərhal fürsəti dəyərləndirən Əhmədzadə buraxılan qolun əvəzini çıxdı. Onun 38-ci dəqiqədə dubl etməyə yaxın olduğunu, lakin Pokatilov səddini aşa bilmədiyini də qeyd edək. Hər halda, komandalar birinci hissədə hərəyə bir qol vura bildi.

İkinci yarıya “Sabah” daha fəal başladı. Meydan sahibləri 53-cü dəqiqədə Zedadkanın qeyri-dəqiqliyi üzündən fürsətdən yararlana bilmədisə, 64-cü dəqiqədə Mikels komanda yoldaşının səhvini təkrarladı. “Bayquşlar”ın 71-ci dəqiqədəki hücumu isə daha təhlükəli alındı. Sadəcə, bu dəfə Mehdi Şafrankonun başla fərqlənmək arzusunu əla seyvlə gözündə qoydu. Nəhayət, 78-ci dəqiqədə “Bank Respublika Arena”da növbəti qol vuruldu. Mikels Rəhmanın uzaqdan göndərdiyi topu tora qovuşdurdu. İş ondadı ki, epizodu VAR-da incələyən Əliyar Ağayev Rəhmanın topu ələ keçirməzdən əvvəl Nihada etdiyi kobud müdaxilə üzündən qolu qeydə almadı. Masazırdakı növbəti qola 90+2-ci dəqiqədə şahidlik etdik. Bu dəfə də baş rol ifaçısı Mikels oldu. Almaniyalı Höccət, Senhadji və Mehdiylə mübarizədən qalib ayrılaraq üçüncü dəfə toru silkələdi. O başqa məsələ ki, Mikelsin bu qolu da qeydə alınmadı. VAR-a baxan ədalət təmsilçisi topun yerə toxunandan sonra məhz Coy-Lensin əlinə dəydiyini gördüyündən yenə eyni qərarı verdi. Beləliklə, gərgin keçən oyun “sülh”lə nəticələndi.

Gözdən qaçmadı
// “Soldati di Sabah”, “Kimyaçılar” və “UltraSumqayıt” tribunalarda yerini almışdı.
// Mikelsin sayılmayan ikinci qolundan sonra bəzi “Sabah” azarkeşləri tribunaları tərk etməyə başladı. Onlar hakimin ədalətsiz qərarlar qəbul etdiyini dilə gətirərək, bir-biriylə söhbətdə narazılıqlarını ifadə etməyə başladılar.
// “Sabah”ın məşqçilərindən Kristian Sebalyos 66-cı dəqiqədə, Valerio Zuddas isə oyundan sonra hakimin qərarına etiraz etdiyinə görə sarı, Kastinas Qasiunas isə 90+4-cü dəqiqədə hakimi təhqir etdiyi üçün qırmızı vərəqə aldı.

KƏNAN BAHADIR