"Kəpəz"in ötən mövsüm komandanı premyer-liqada saxlamağı bacaran Azər Bağırovla anlaşdığını xəbər vermişdik. Gəncə təmsilçisinin köhnə-yeni baş məşqçisi ilə müqavilənin müddəti "futbol ili"nin sonuna qədərdi.

"Football-plus.az" Azər bəylə əlaqə saxlayıb, bəzi önəmli məqamlar haqda fikirlərini öyrəndi.

- Maraqlıdı, ötən mövsüm hansı məsələlərdə anlaşa bilməmişdiz ki, bu dəfə alındı? Buna əvvəl nə mane olmuşdu?
- Bu məsələyə qayıtmaq istəmirəm. Hər şey geridə qalıb. Bu gün "Kəpəz"dəyiksə, qollarımızı çırmalayıb komandanın uğurları üçün çalışmalıyıq.

- Məlum ayrılıq mənzərəsindən sonra qayıtdıqda hansı hissləri keçirdiz?
- Düzü, stadiona yaxınlaşanda sözün əsl mənasında duyğulandım. Ancaq bəzi reallıqlar var ki, bununla barışmaq lazımdı. Hər işdə bir xeyir var. Allaha həmd olsun.

- İşsiz günlərdə çempionatla maraqlana bilmisiz? Yoxsa sizə vaxt lazım olacaq?
- Demək olar ki, çempionatın bütün matçlarını canlı izləmişəm. Bəlkə hansısa matçın bir neçə dəqiqəsini izləyəməyə vaxt olmayıb. Çempionata bələdəm, hadisələrin axarından xəbərdaram.

- Heyətin hədəfə çata bilmək üçün yetərli olduğunu düşünürsüz? Yoxsa ciddi dəyişikliklərə ehtiyac var? Nəzərə alaq ki, "transfer pəncərəsi" bağlıdı...
- Heyətdə ciddi dəyişiklik etmək üçün böyük imkanlara malik olmaq lazımdı. "Kəpəz"ə 12 legioner transfer olunub. Hazırda azad agent statusu daşıyan təcrübəli yerli futbolçu yoxdu. Bu gün minimum şərtlərlə razılaşmağa, işləməyə məcburuq. Əlimizdə olan heyətlə yaxşı işlər görməyə çalışacağıq.

KƏNAN BAHADIR