Uğursuz nəticələrdən sonra "Kəpəz"in baş məşqçi postundan istefa verən Adil Şükürov "Football-plus.az"a müsahibə verib.

- Özünüzü nə dərəcədə günahkar hiss edirsiz?
- Uğursuzluq baş məşqçinin, uğur hamının olur. Həmişə belə olub. Məni üzən məsələlərdən biri odu ki, məşqlərdə futbolçuların gözlərindəki istəyi oyunlarda tam görmədim. Bu amil çox önəmlidi...

- Bir neçə gündü azarkeşlə məlum dialoqunuza görə qınanılırsız. Sakit başla düşünəndə səhv etdiyinizi düşünürsüz? Sizcə, haqlıydız?
- Azarkeşlər həmişə komandanın uğurunu istəyir. İndi haqlı-haqsız axtarmaq vaxtı yox, "Kəpəz"in uğuru üçün birləşmək vaxtıdı.

- Ardıcıl iki cəhdin istefayla nəticələnməsinin məşqçilik karyeranızı təhlükəyə atdığını düşünürsüzmü?
- 8 ildən sonra qayıtdım. İlk dönüşdə Allahın izniylə "Kəpəz"i çempionatın bitməsinə iki ay qalmış premyer-liqada saxladıq. Daha sonra səbəbi bəlli olan hadisə baş verdi və "Kəpəz"in xeyri üçün komandadan ayrıldım. Bu il isə fərqli oldu... Bu cür olacağını heç düşünmürdüm... Nöqsansız heç kim yoxdu. Bəzən komandaya ən yaxşı futbolçuları yığa, dünyanın ən yaxşı məşqçisini təyin edə bilərsən. Amma belədə də yaxşı nəticə olmaya, məşqçi ilə yollar ayrıla bilər.

- "Kəpəz"dən təzminat aldız?
- Bu barədə danışmayaq.

KƏNAN BAHADIR