“Barselona” stadionla bağlı problemini qismən yoluna qoyub. İspaniya çempionunun Çempionlar Liqasının Liqa mərhələsinin 2-ci turunda ev oyununu harda keçirəcəyi məlum olub.

Klub bununla bağlı rəsmi açıqlama yayıb. Məlumatda komandanın oktyabrın 1-də PSJ ilə Luis Kompanis adına Olimpiya stadionunda qarşılaşacağı qeyd edilib. Eyni zamanda hazırda yenidənqurma işləri sona çatan “Spotifay Kamp Nou”nun açılması üçün lazım olan inzibati icazələrin alınması ilə bağlı lazımi addımların atıldığı da bildirilib.

Xatırladaq ki, iyunun 25-də “Barselona”nın “Spotifay Kamp Nou”ya yeni mövsüm ərəfəsində qayıdacağı elan edilmişdi. Lakin avqustda dönüşün inzibati prosedurlara görə bir qədər də ertələnəcəyi məlum olmuşdu. Komanda son iki mövsümdə təxminən 52 min yerlik Luis Kompanis adına Olimpiya stadionunda çıxış edib. “Barselona” ölkə çempionatında cari mövsümün ilk üç oyununu səfərdə keçirib. La Liqanın 4-cü turunun “Valensiya” ilə ev oyunu (6:0) isə 6 min tamaşaçı tutumuna malik olan Yohann Kroyff adına arenada baş tutub.