Xəbər verdiyimiz kimi öz meydanında ''Qarabağ''a uduzmaqla Çempionlar Liqasının əsas mərhələsinə şok məğlubiyyətlə start verən ''Benfika''da baş məşqçi Bruno Laje ilə yollar ayrıldı.

Başqan Rui Koşta son uğursuzluqları təcrübəli məşqçiyə bağışlamadı. ''Qarabağ''la oyunda öncə ''Benfika'' daxili çempionatda doğma fanatları önündə uzun müddət azlıqda oynayan ''Santa Klara''nı da məğlub edə bilməmişdi (1:1).

Bu arada Portuqaliya mənbələrinin yazdığına inansaq, ''qartallar''ın yeni çalışdırıcısı artıq bəllidi. Bu, Joze Mourinyodu. İddialara görə Koşta ''Qarabağ''a məğlubiyyətdən bir neçə saat sonra Mourinyo ilə əlaqə saxlayıb və onlar telefonla uzun müzakirələr apararaq sonda anlaşma əldə ediblər. Hazırda müqavilənin son detalları ilə bağlı danışıqlar gedir. Rəsmi açıqlamanın ən qısa müddətdə veriləcəyi gözlənilir.

Məlum olduğu kimi ünlü portuqaliyalı mütəxəssis ən son ''Fənərbaxça''da işləmiş və avqustun sonlarında istefaya göndərilmişdi. Təsadüfə bax ki, məhz ''Benfika''ya məğlubiyyətdən sonra Mourinyonun Türkiyə macərası başa çatmışdı. İndi isə o, bu klubun başına keçir. Özü də bu məşqçi ÇL-in təsnifatında ''Benfika''ya uduzduqdan sonra həmin vaxt heyətinin dəyəri 300 milyon avroya yaxın olan ''Fənərbaxça''nın heyətinin ÇL üçün yetərli olmadığını iddia etmişdi.

Cəmi 24 milyon avroluq heyətə malik olan ''Qarabağ'' həm Mourinyoya, həm də futbol dünyasına növbəti dəfə xatırlatdı ki, futbolda maddi güc heç də hər zaman həlledici rol oynamır.

Onu da bildirək ki, oktyabrın 25-də ''Benfika''da prezident seçkiləri keçiriləcək. ''Qarabağ''a məğlubiyyətdən sonra indiki prezident Rui Koştaya yönələn etirazlar artıb. Müxalifətin əsas namizədi sayılan Joao Noronyo Lopeşin isə mövqeyi güclənib. Amma Mourinyonun təyinatından sonra Koştanın yenidən əlinin-qolunun güclənəcəyi gözlənilir.