Ötən il mayın 29-da “Barselona”nın “sükanı arxasına” keçən, klubla 2026-cı il iyunun 30-na qədər müqavilə bağlayan Hans-Diter Flikin ilk mövsümü arxada qaldı.

"Football-plus.az" xəbər verir ki, alman mütəxəssis işə başlayarkən komandanın qarşısına yeddi əsas vəzifə qoymuşdu. İndi bu vədlərin hər birini yerinə yetirdiyini demək olar.

İlk vəzifə oyun üslubu ilə bağlı idi. Flik həmin vaxt belə demişdi: “Kroyff ilə Qvardiolanın ideyalarından geri çəkilmək fikrində deyilik”. Nəticə: komanda yenidən tanış “Barselona” futbolu göstərməyə başlayıb – topla, oyunun axarına nəzarət etməklə, inadkarcasına. Flik debüt mövsümündə ölkədaxili trebl etməklə adını tarixə yazıb. Yeganə səhv Çempionlar Liqasının yarımfinalında “İnter” önündə büdrəmək idi.

İkinci hədəf – hücumla müdafiə arasında balans tapmaq. Komanda mövsümə möhtəşəm yüksək xətt və rəqiblərin rekord sayda ofsaydı ilə başladı. Hə, mövsümün sonuna yaxın bir qədər gerilədilər, ancaq ümumi mənzərə heyranlıq doğurdu.

Hücum? Mövsüm ərzində 174 qol – Avropada ən yaxşı, klub tarixində üçüncü nəticə. Gənclərə etibar etmək də vədlərdən biri idi və alman çalışdırıcı sözünü tutdu. Beş debütant və Lamin Yamalın yeni səviyyəsi.

Flik taktika ilə bağlı bəribaşdan xəbərdarlıq etmişdi: məndən müntəzəmlik gözləməyin. Nəticədə komanda yaradıcılıq axtarışına çıxdı, eksperimentlərə əl atdı, ardından sabit və effektli 4-2-3-1-in üzərində dayandı ki, bu da titullar gətirdi.
Almaniyalı çalışdırıcı qələbələr qazanmağı və fanatları sevindirməyi vəd etmişdi. Titullar? Var. Məmnunluq? “Real”ı mövsüm ərzində dörd dəfə darmadağın edən komandanın azarkeşləri məmnunluqdan başqa nə hiss edə bilər ki?!

Flik ağır zədədən sonra Qavini ehtiyatla meydana qaytardı, həmçini Frenki de Yonqun özünəinamını bərpa etdi. İndi klub niderlandlı yarımmüdafiəçi ilə müqavilə müddətini uzatmağı müzakirə edir.
Baxın, Flik bir ildə görün nələrə nail olub! Bu hələ başlanğıcdısa, “Barsa” azarkeşləri kəmərləri bərkitməlidi. Bəlkə də irəlidə onları böyük bir epoxa gözləyir.