Çox qısa zaman kəsiyində Azərbaycan pasportu daşıyan üçüncü futbolçu da Qırğızıstanın “Abdış-Ata” klubuna transfer olundu. Söhbət Mirabdulla Abbasovla İlkin Muradovdan sonra Qırğızıstana yollanan Orxan Əliyevdən gedir.

Mirabdullanın agentinin Qvanzav Maqomedov olduğu bəllidi. Bəs İlkinlə Murad necə getdi? Onları kim apardı? Nə deyib razı saldılar? Qışda başlayacaq Asiya Çempionlaq Liqasının təsnifat mərhələsinə aldanırlar? Biz futbolçularımızın legioner həyatı yaşamasının tərəfdarıyıq. Amma daha Qırğızıstanda yox ki...

Ötən mövsümün qışında Kurban Berdıyevin avrokuboklara vəsiqə qazanmaq üçün transfer etdiyi, Azər Bağırovun böyük futbola qaytardığı Orxan Əliyev gələn mövsüm “Abdış-Ata”nın uğurları üçün tər tökəcək. Birdən-birə üç orta səviyyəli futbolçunun bu komandaya getməsi həqiqətən də qəribədi. Daha çox yerli futbolçulara üstünlük verən Qırğızıstan klubunda bir ölkədən olan ən çox legioner sayı üçə yüksəldi. O da məhz Azərbaycana aiddi.

Mirabdulla ötən mövsüm uzun fasilədən sonra böyük futbola qayıtmışdı. Amma “Səbail”də arzulanan oyunu göstərə bilmədi, legionerlərin kölgəsində it-bat oldu, “dənizçilər”in elitadan aşağı yuvalanmasına mane ola bilmədi. İlkin Muradov isə premyer-liqada 174 oyuna çıxıb, 3 qol, 12 məhsuldar ötürmə ilə yadda qalıb. Orxan Əliyev 175 oyuna 26 qol, 11 məhsuldar ötürmə müəllifidi.

Xatırladaq ki, hazırda Qırğızıstan çempionatı davam edir və təqvim ilinin sonunda başa çatacaq. İlkinlə Orxanın müqavilə müddəti dəqiq bilinməsə də, Mirabdulla 2025-in sonuna qədər müqavilə imzalayıb.

MÜZƏFFƏR QULUZADƏ