Xəbər verdiyimiz kimi, qışda “Səbail”ə qoşulan Mirabdulla Abbasov Qırğızıstanın “Abdış-Ata” klubuna transfer olunub. Mirabdullanın ardından İlkin Muradov da eyni komandaya keçib. Çox güman, o da Qvanzav Maqomedovun vasitəçiliyi ilə.

Bəs azərbaycanlı futbolçular “Abdış-Ata”da nə görüblər?

Öncə onu bildirək ki, “yaz-payız” sistemi ilə keçirilən Qırğızıstan çempionatı hazırda davam edir. 13 turdan sonra “Abdış-Ata” 25 xalla 5-ci pillədədi. Kant şəhərinin təmsilçisi Qırğızıstan çempionatına görə ortabab olsa da, Azərbaycan klubları ilə müqayisəyə gələsi deyil.

Çox maraqlıdı, futbolçularımız nəyə görə ora gedir? Güclü maliyyə imkanları da yoxdu ki, deyəsən pula görə gediblər. Autsayder elita, yaxud ortabab 1-ci liqa klublarımız “Abdış-Ata”dan daha əlverişlidi. İlkin Muradov “transfermarkt” dəyərinə görə klubun ən dəyərli ikinci futbolçusu olacaq. Klubun ümumi “transfermarkt” dəyəri heç üç milyon avro deyil.

İlkinin 29, Mirabdullanın 30 yaşı var. Rəqabətədavamlı olmayan, yığmaya yol açmayan Qırğızıstan çempionatına yollanmağın heç bir məntiqi izahı yoxdu. Varsa, qoy özləri desinlər!

MÜZƏFFƏR QULUZADƏ