Beynəlxalq Futbol Assosiasiyaları Şurası (BFAŞ) futbolun gələcəyi baxımından radikal hesab oluna biləcək qərarlar qəbul etməyə hazırlaşır.

''Tayms'' nəşrinin məlumatına görə qurum penalti zərbəsi və VAR müdaxilələri ilə bağlı yeni qaydalar üzərində baş sındırır.

Penalti ilə bağlı yeni təklif ondan ibarətdi ki, zərbədən sonra top qapıçıdan və ya dirəkdən dönəcəyi təqdirdə oyun dayandırılacaq. Top rəqibə veriləcək və oyun qapıdan zərbə ilə davam etdiriləcək. Yəni təkrar zərbə ilə artıq topu qapıya göndərmək mümkün olmayacaq.

VAR-a gəlincə, onun belə desək, müdaxilə zonası genişləndirilir. Məsələn, hakim səhvən künc zərbəsi təyin etdikdə VAR artıq buna müdaxilə edəcək. Eyni şəkildə hakim səhvən ikinci sarı vərəqəni göstərib futbolçunu meydandan qovduqda da VAR epizoda müdaxilə edə biləcək.

Məqsəd VAR sayəsində hakim səhvlərini bir qədər də minimuma endirməkdi. Ancaq bu qaydaların qüvvəyə minməsi üçün razılıq əldə olunmalıdı.

Bu təklif BFAŞ-ın noyabrdakı toplantısında rəsmən irəli sürüləcək. Daha sonra 2026-nın martındakı toplantıda səsverməyə çıxarılacaq. Nəticə müsbət olsa, qaydalar gələn ilin iyunun 1-dən qüvvəyə minəcək və ən əsası DÇ-2026-da tətbiq olunmağa başlayacaq.