Ötən mövsümün gedişində “Səbail”in baş məşqçi postundan ayrılan Şahin Diniyev həmin vaxtdan bəri işsizdi. Bununla belə, ölkə futbolunda başverənləri yaxından izləyir.

Onunla söhbətləşməyi lazım bildik.

- Şahin bəy, necəsiz, nə iş görürsüz?
- Çox şükür, hər şey yaxşıdı, hər şey yolundadı.


- Geridə qalan mövsümü necə dəyərləndirirsiz? Sizi ən çox hansı komandalar təəccübləndirdi? İstər müsbət, istərsə mənfi mənada.
- Bəzi komandalar ümidləri doğrultdu, bəziləri yox. Ümidləri doğrultmayan “Sabah” və “Neftçi”di ki, belə maliyyə imkanlarına malik klublar “avrokubok zonası”nda olmalıydılar. Bəzi çatışmazlıqlar onların belə tale yaşamasına gətirib çıxardı. Məşqçi dəyişiklikləri, sabit heyətin olmaması əsas məqamlardandı. Mövsümün əvvəlində heç kim deyə bilməzdi ki, yuxarı yerlərdə “Araz-Naxçıvan” və “Turan Tovuz” olacaq. “Araz-Naxçıvan” 3-cü yerdi tutu. Mövsüm onlar üçün çox eniş-yoxuşlu keçdi. Dekabra qədər çoxlu xal yığdılar. O xallar da Naxçıvan təmsilçisinin mükafatçılar arasında qalmasına kömək etdi. Buna görə də “Araz-Naxçıvan”ın yaxşı mənada təəccübləndirdiyin deyə bilərik. “Turan Tovuz” da avrokuboklara getməyə çox yaxın idi. Sadəcə, kubokun finalında “Sabah”ın qalib gəlməsi planları pozdu. “Qarabağ” layiqli oyun göstərməklə çempion oldu. “Zirə” də çox yaxşı oynadı. Yerinə görə yox, ümumiyyətlə, oyun baxımından “Zirə” bu mövsüm çox yaxşı idi. Taktiki baxımdan çox inkişaf ediblər, rəngarəng oyun göstərirlər. Əvvəldən “Zirə”ni az qol vuran komanda kimi tanıyırdıq. Bu il isə belə olmadı. Tam başqa oyun göstərdilər. Heyətləri sabitdi. İki-üç yaxşı rotasiya futbolçuları da var. Avrokubokda iştirak edəcək bütün klublara uğurlar arzulayıram. Çətin rəqiblərimiz var. Reytinqimiz elədi ki, güclü klublarla qarşılaşmalı oluruq.

- Möcüzə baş verməsə, Rafael Utziq “Zirə”dən ayrılacaq. Necə düşünürsüz, Konate və Boqomolski onun yerini doldura biləcək?
- Utziq “Zirə” üçün sima idi. Çox yaxşı hücumçudu. Tam “Zirə”nin üslubuna uyğun futbolçudu. Düşünürəm ki, onun yerini doldurmaq mümkün olacaq. Düzdün seleksiya ilə yaxşı hücumçu alsalar, “Zirə” də öz yoluna yaxşı şəkildə davam edə bilər. Boqomolski və Konate Utziqdən fərqli futbolçulardı. Konate yarımmüdafiə xəttindədi. Boqomolski ilə Utziq arasında fərq görürəm. Utziq daha keyfiyyətli futbolçudu. Düşünmürəm ki, Boqomolski əsas hücumçu kimi gətirilsin. Məncə, onu rotasiya üçün transfer ediblər. Yəqin ki, mərkəz hücumçusu transferini reallaşdıracaqlar.

- Birinci və ikinci liqada da maraqlı mübarizə getdi. Oyununu bəyəndiyiniz klublar hansılar idi?
- İdman prinsipi bərpa olunub deyə, 1-ci və 2-ci liqa çox maraqlı oldu. İntriqa yarandı. Bir çox komanda yüksək yer uğrunda oynayır. Liqadakı oyunlar da, pley-off oyunlarının keçirilməsi də çox maraqlı oldu. “Qəbələ” 1-ci liqada mövsüm başlayandan bitənə qədər dominantlıq etdi və elitaya yüksəlməyə çox layiq idi. “İmişli” və “Karvan” da yaxşı oyun göstərdi.

- Oğlunuz Coşqunun ölkəyə qayıtmaq niyyəti yoxdu. Bu çox sevindirici haldı. Amma sanki Türkiyədə klub seçimində səhvlərə yol verir. Siz necə düşünürsüz?
- Ceyhunun “Çorum”la müqaviləsi var. Bəlkə də düz deyirsiz, verdiyi qərarlar doğru olmaya bilər, amma futbolçunun agenti var, Coşqun təklif olunanları dəyərləndirir. Hansısa qərarlar tez verilir, gec verilir. Dəqiq olan budu ki, artıq dördüncü mövsümdü Türkiyədədi, o bazarda özünü doğruldub. Düşünürəm ki, daha uğurlu ola bilər, bunun üçün də çox çalışmalıdı.

- Gənc və yeniyetmə futbolçuları, yəqin ki, izləyirsiz. Gələcək milli komanda adına, Azərbaycan futbolu adına ümid verirlər? Edqara, Rufətlərə, Nərimana baxıb ümidlənirsiz? Legioner limitinin ləğvi necə təsir göstərə bilər?
- Məni bir məqam həqiqətən də çox narahat edir. O suala hələ də cavab tapa bilməmişik - nə siz, nə biz. Çempionatda qarşıdakı mövsümdən legioner limiti ləğv olunacaq. Legioner gətirmək asanlaşır. Milli futbolçuların nə qədər oynayacağı sual altına düşür. Çox vacib məqamdı. Yerli futbolçular deyəndə gəncləri də nəzərdə tuturam. Demək olar ki, bir çox klubda keyfiyyətli gənc və yeniyetmə futbolçular var. Gələn mövsüm onlar nə qədər oynayacaq - çox vacib məsələdi. Bunu zamana buraxaq. Gənc və istedadlı futbolçuların “artırması” üçün oynamaları vacibdi. 15-20 dəqiqə yox. Sabit şəkildə ən azı 45 dəqiqə mübarizə aparmalı, rəqabətə dözümlü olmalıdılar ki, yeni Azərbaycan millisinin təməlini qura bilsinlər. Bu bizim üçün çox böyük sınaqdı. Legioner limitinin ləğvinin təsirini bizə zaman göstərəcək. İndidən nəyisə ehtimal etmək doğru olmaz. Futbol proqnozları sevmir. Fikrimcə, dekabra qədər hər şey aydınlaşacaq.

MÜZƏFFƏR QULUZADƏ