''Liverpul''un lideri və əsas ulduzu Məhəmməd Salah mövsümün yorğunluğunu Türkiyədə çıxarır.

Geridə qoyduğumuz mövsümdə bütün turnirləri nəzərə almaqla 34 qol, 23 məhsuldar ötürməlik mükəmməl performans sərgiləyən misirli futbolçu hazırda Türkiyədə tətildədi. O bu yay tətil üçün Bodrumu seçib. Dünyaca ünlü isimlərin istirahətlərini Türkiyədə keçirməsi yeni xəbər deyil.

Adətən onların istirahət vaxtı ödədiyi hesablar diqqət mərkəzinə düşür. Təxminən 10 gün öncə ''Bayer-04'' və Niderland yığmasının üzvü Ceremi Frimponq 1 gecədə bir restorana 600 min lirə hesab ödəməklə diqqət çəkmişdi ki, bu da bizim pulla təxminən 25 min manat deməkdi.

Salaha gəlincə, o, dünən daha 6 dostu ilə birlikdə dəniz kənarındakı bir restoranda axşam yeməyi yedi. Həftəlik 480 min funt sterlinq qazanan məşhur futbolçu orda 60 min lirə (təxminən 2550 manat) hesab ödədi. Restoranın çıxışında jurnalistlərin əhatəsinə düşdüyünü fərq edən Salah gülümsəyərək ''bura yalnız tətil üçün gəlmişəm, icazənizlə mən gedim'' deyərək məkandan ayrıldı.

33 yaşlı futbolçu gecəni Bodrumun ən populyar nöqtələrindən olan Yalıkavakda yerləşən bir gecə klubunda keçirdi.