“Biz “Göyqurdlar” azarkeş qrupu olaraq, əsas millilərimizi yalnız nəticəyə görə yox, Azərbaycanın adını və bayrağını təmsil etdiklərinə görə dəstəkləyirik. Qələbə qazansalar da, uduzsalar da, meydanda Azərbaycan bayrağı üçün döyüşən hər bir futbolçunun yanında olmuşuq və olmağa davam edəcəyik. Lakin Litva ilə bu qədər vacib oyundan öncə 4 əsas qadın futbolçunun kişilərin oynadığı şou xarakterli Media Liqasında oynaması bizim üçün anlaşılmaz və qəbuledilməz oldu. Matçdan bir gün əvvəl bu məsələ ilə bağlı həm baş məşqçiyə, həm də komandanın məsul şəxsinə suallar ünvanladıq. Təəssüf ki, verdikləri cavablar bizim üçün qənaətbəxş deildi. Rəsmi səhifəmizdə bu məsələni qabartmamağımızın əsas səbəbi isə uğursuz nəticə halında “psixoloji təzyiq göstərdiz”, “komandanın motivasiyasını pozduz” kimi iddialarla “qurbanlıq qoyun” elan olunmağı istəməməyimiz idi. Vacib qarşılaşmadan öncə 4 əsas futbolçunun şou xarakterli tədbirə göndərilməsi istər-istəməz komandanın daxilində intizam və ya qərarvermə mexanizmi ilə bağlı suallar doğurur. Belə halların baş verməsi həm futbolçuların, həm də azarkeşlərin motivasiyasına zərbə vurur. Azərbaycan Futbol Federasiyaları Assosiasiyasının bu məsələyə aydın və ictimaiyyətə açıq izah verəcəyinə ümid edirik. İnkişaf yalnız şəffaflıq və inam üzərində qurula bilər. Matçdan əvvəl qadın futbolçularla görüşdük, uğurlar arzuladıq və Litvada 2:0 hesabı ilə qalib gəldikləri səfər oyununda meydana çıxan oyunçularımıza “Göyqurdlar” tişörtlərini hədiyyə etdik. Çünki biz bu komandaya inandıq, yanında olduq. Bundan başqa, diqqət yetirilməli başqa bir məqam da oyunun vaxtı və məkanıdır. Bizim tərkibimizdə azyaşlı yoxdur və yer verməməyi doğru bilirik. Heyətimizin əksəriyyəti tələbələr və işləyən insanlardır. Həftəiçi saat 18.00-da oyun keçirilməsi azarkeşlərin iştirakını ciddi şəkildə məhdudlaşdırır. Bakı kimi böyük və nəqliyyat yükü ağır olan bir şəhərdə, iş və dərs saatlarının bitdiyi pik zamanda oyuna çatmaq real deyil. Gələcəkdə oyun saatlarının və stadion təyinatlarının bu reallıqlar nəzərə alınaraq planlaşdırılmasını arzulayırıq. Minifutbol üzrə dünya çempionatında komandanı tribunadan toplu şəkildə dəstəkləmədik. Çünki biz bu turniri nə peşəkar, nə də ciddi idman turniri kimi qəbul edirik. Dünyada tanınmış futbol təşkilatlarının heç biri belə yarışları ciddiyə almır. Biz yalnız kişilərdən və qadınlardan ibarət yığmalarımızı dəstəkləyirik və gələcəkdə də diqqətimizi məhz bu komandaların yanında olmağa yönəldəcəyik”.