Onsuz da hər yay azərbaycanlı futbolsevərlərin ümidləri əsasən “Qarabağ”la bağlı olur.

"Football-plus.az" xəbər verir ki, həftəsonu “köhlən atlar”ın Çempionlar Liqasının 2-ci təsnifat mərhələsindəki mümkün rəqibləri, eləcə də onların 3-cü mərhələnin püşkatması zamanı hansı səbətdə yer alacağı dəqiqləşib.

Yüksək reytinqi sayəsində 1-ci mərhələdən azad olan “Qarabağ” mübarizəyə 2-ci mərhələdən başlayacaq. “Səpələnmişlər” səbətində yer alacaq Azərbaycan çempionatının bəxtinə nisbətən zəif rəqiblərin düşməsi təbiidi. Beləliklə, ağdamlıların yolunun üstünə “Pafos” (Cənubi Kipr), “Rieka” (Xorvatiya), həmçinin 1-ci təsnifat mərhələsinin cütlərinin qalibləri (“Jalgiris” Litva, RFŞ Latviya, “Zrinski” Bosniya və Hersoqovina, “Linkoln Red İmps” Cəbəllütariq, KuPS Finlandiya, TNS Uels, “Drita” Kosovo, “Breydablik” İslandiya, “Linfild” Şimali İrlandiya, “Buduçnost” Monteneqro) çıxa bilər.

2-ci mərhələnin püşkü iyunun 18-də atılacaq, bu mərhələnin oyunları iyulun 22-23-ü və 29-30-da keçiriləcək. 3-cü mərhələnin püşkü iyulun 21-də, yəni 2-ci mərhələnin oyunları keçirilənə qədər atılacaq. “Qarabağ” 3-cü mərhələdə də “səpələnmişlər” arasında olacaq. Buna görə Zaqreb “Dinamo”sunu qabaqlamaqla Xorvatiya çempionu olan “Rieka”ya təşəkkür düşür. “Rieka” aşağı reytinqə malik olduğuna görə “Qarabağ” 3-cü mərhələnin püşkatmasında “Kopenhagen” (Danimarka), “Srvena Zvezda” (Serbiya), “Ferentsvaroş” (Macarıstan), Makkabi (T-Ə, İsrail) və “Slovan” (Slovakiya) ilə birgə “səpələnmişlər” sırasında yer alacaq.

3-cü təsnifat mərhələsinin oyunları avqustun 5-6-sı və 12-də keçiriləcək. Nəhayət, pley-offun püşkü avqustun 4-də atılacaq. Təbii ki, “Qarabağ” 2-ci təsnifat mərhələsini keçərsə, püşkatmada yer alacaq. Pley-offun püşkatmasında Qurban Qurbanovun komandası “səpələnməmişlər” sırasında olacaq. Mümkün rəqiblər sırasında “Bude/Qlimt” (Norveç), “Seltik” (Şotlandiya), həmçinin 2-ci mərhələni adlayacaqları təqdirdə “Kopenhagen”, “Srvena Zvezda” və “Ferentsvaroş” da var.