“La Gazzetta dello Sport” aprelin son günlərindən birində Klaudio Centiledən müsahibə götürüb. İtaliya yığması ilə DÇ-1982-nin qalibi olan sabiq müdafiəçi “Yuventus”un oyunlarına sona qədər baxa bilmədiyini etiraf edib.

"Football-plus.az" xəbər verir ki, Turin klubunda 1973-84-cü illərdə 415 oyun keçirən, 6 dəfə çempion olan 71 yaşlı dünya çempionu komandanın bu mövsüm çıxış etdiyi turnirlərdəki uğursuzluqlarına görə çox məyusdu.

- Mənim üçün bu haqda danışmaq çətindi. Çünki mən “Yuventus”un formasını daşımağın nə oduğunu yaxşı bilirəm. İndi mənə elə gəlir ki, hazırkı komanda mənim “Yuventus”um deyil.

- Niyə?
- Mənim xatırladığım əsl “Yuventus”dan heç nə qalmayıb. Ola bilsin ki, heyətdəki oyunçulardan yalnız Yıldız böyük istedad yiyəsidi. Ancaq bir türk futbolçu mövcud vəziyyəti dəyişə bilməz. Qalanları məndə komanda kimi yalnız böyük məyusluq doğururlar. Mən futbol oynadığım dövrdə kluba “Avvokato” Anyelli və Campyero Poniperti kimi böyük funksionerlər rəhbərlik edirdilər. Onlar komandaya qoşulan hər bir oyunçuya ilk gündən “oğlan, sən artıq “Yuventus”dasan, bu, xüsusi klubdu, burda bəzi hərəkət və davranışlar yolverilməz hesab olunur” düşüncəsini aşılayırdılar. Həmin rəhbərlər doğru deyirdilər. “Yuventus” həmişə xüsusi qalib mentallığı ilə seçilib. Mənim dövrümdə hətta 2-ci yer yarıbayarı faciəyə bərabər tutulurdu, indi isə komanda A seriyasında 4-cü yerə iddiasını davam etdirdiyinə görə sevinirlər... “Yuventus” yalnız skudetto uğrunda mübarizə aparmalıdı, zirvədən çox uzaq düşən komanda olmamalıdı.

- Uğursuz mövsüm və ya məyusluq?
- Hər baxımdan məyusluq. Ötən yay klubun düşərgəsində eyforiya hökm sürürdü, komandaya böyük ümidlər bəslənilirdi, amma bu vəziyyət tədricən aradan qalxdı. Bayaq səsləndirdiyim fikirlər yalnız mənə məxsus deyil. Hər gün ünsiyyətdə olduğum azarkeşlərin əksəriyyəti belə düşünür.

- Bəs hazırkı vəziyyətə görə kim daha çox məsuliyyət daşıyır?
- Zərbə altına düşən ilk şəxs məşqçi olur. Həqiqətən də, belə oldu və Tyaqo Motta istefaya göndərildi. Əlbəttə, uğursuz nəticələrə görə onun da günahı vardı, hadisələr məhz belə cərəyan etdiyi üçün təəssüflənirəm. O, əvvəlki mövsümdə “Bolonya” ilə baxımlı oyunu lazımi nəticələrlə sinxronlaşdıra bilmişdi. Amma “Yuventus” başqa səviyyəli klubdu, burda yalnız titullar qazanmalısan. Hələ 19 yaşımda Turinə gələndə bunu mənə Boniperti ilə komandanın məndən yaşca böyük olan oyunçuları başa salmışdılar. Boniperti indiki uğursuzluqlardan sonra növbəti mövsümdə yüksək məvacib alacağına ümid edə bilməzdi.

- Sizcə, o, hazırkı vəziyyəti necə qəbul edərdi?
- Bilmirəm, ona görə ki, onun dövründə vəziyyətin bu dərəcədə pis ola biləcəyini düşünmürəm. Boniperti “Yuventus”u hamıdan yaxşı tanıyırdı və oyunçuların qabiliyyətinə bələd idi: transfer məsələsində nadir hallarda səhvə yol verirdi. Mövcud nəticələrə nəzər salsaq, Cuntoli haqda tamamilə fərqli fikirdəyəm. O, transfer bazarında çox səhvlər edib.

- Sizi daha çox kim məyus edib: 51 milyonluq Koopmeyners, 50 milyonluq Duqlas Luis, yoxsa 33 milyon avroya alınan Qonsales?
- Bu mənada konkret ad çəkməyin tərəfdarı deyiləm, amma bir sıra oyunçuların çoxlarını məyus etdiyi aydın məsələdi.

- “Yuventus” Çempionlar Liqasına vəsiqə qazana biləcək?
- Buna ürəkdən ümid edirəm. Amma “Parma”ya məğlubiyyətdən sonra içimdə bir qədər həyəcan baş qaldırıb.

- Hansı komanda İtaliya çempionu olacaq?
- Kontenin “Napoli”sinə pitsadan mərc edərdim.

- İqor Tudoru növbəti mövsüm üçün komandada saxlayardız, yoxsa Konteni geri qaytarardız?
- Tudor baş məşqçi vəzifəsində yalnız bir neçə oyun işləyib. “Yuventus”da isə məşqçilərin fəaliyyətini nəticələrə görə mühakimə edirlər. Baxarıq, görək komanda mövsümü neçənci yerdə başa vuracaq. Hələlik konkret nəsə demək olmur.

- Bəs Kontenin Turinə mümkün dönüşü haqda nə deyərdiz?
- Antonio qalib ruhuna malikdi, “Yuventus”u çoxlarından yaxşı tanıyır. Onun dönüşü klub üçün müsbət amil ola bilər. Oyunçulara formasını daşıdıqları klubun əsas xüsusiyyətlərini başa salan şəxsin mövcudluğu həmişə faydalıdı.

- Artıq klubda işləyən Kyellininin fəaliyyəti haqda nə düşünürsüz?
- O, klubun əsl əfsanəsi və doğru dəyərlərə malik şəxsiyyətdi. Corco “Yuventus”un yeni layihəsinin mərkəzində olmağa layiqdi. İşlər qaydasında getməyəndə Boniperti oyunçulara klubun hansı anlama gəldiyi haqda danışırdı. Kyellini eyni funksiyanı yerinə yetirə bilər, ağ və qara rəngləri onun qanına hopub. Bundan başqa, o, möhtəşəm müdafiəçi olub... İndi onun səviyyəsində müdafiəçiyə nadir hallarda rast gəlinir. Hamı yalnız mərkəz müdafiəçisinin hücumu başlamağı bacarıb-bacarmamasına baxır.

- Klub ötən yay xarici ölkələrdən olan 12 futbolçunun transferinə görə 200 milyon avrodan çox xərcləyəndən sonra indi yalnız bir italiyalını – Tonalini hədəf seçib. Komandanın keyfiyyətli sıçrayışı üçün bir yerli oyunçu alması kifayət edər?
- Bu, əla transfer olardı, bir də ki, Tonali italyandı. Sandronun “Yuventus”da daha güclü oyunçuya çevrilə biləcəyinə əminəm. Amma skudettoya real şəkildə iddia etmək üçün hər mövqeyə yüksək səviyyəli oyunçular alınmalıdı. “Yuventus”da inqilaba ehtiyac yoxdu, ancaq komandanın səviyyəsini qaldırmaq vacibdi.

- Sizin dövrünüzdən olan hansı futbolçu bu gün Tudorun komandasına Çempionlar Liqasına vəsiqə qazanmaqda daha faydalı ola bilərdi?
- Paolo Rossi kimi əsl bombardir. Vlahoviç ilə Kolo Muani çoxdandı qol vura bilmirlər. Amma Boniperti ilə əsla indiki kimi vəziyyət yarana bilməzdi.