Futzal üzrə yüksək liqada rəqabətin başa çatdığını iddia etmək üçün əsaslarımız var. Ona görə ki, lider “Araz-Naxçıvan” sona 3 tur qalmış ən yaxın izləyicisi “Neftçi”dən 3 xal öndədi. Muxtar Respublika təmsilçisi bundan sonra əsas rəqiblərindən yalnız “ağ-qaralar”la qarşılaşacaq.

Bəs, “qırmızı-ağlar” bakılılara uduzsa və xallar bərabərləşsə, necə olacaq? Belədə komandalar arasında keçirilən oyunların nəticələrinə nəzər salmaq vacibdi. Onlar indiyə qədər üç dəfə qarşılaşıb və aşağıdakı hesablar qeydə alınıb.

Araz-Naxçıvan – Neftçi 2:3
Neftçi - Araz-Naxçıvan 0:6
Araz-Naxçıvan - Neftçi 5:4

Göründüyü kimi, naxçıvanlılar “Neftçi”yə uduzsa, qələbə sayı bərabərləşəcək. Deməli, vurulan və buraxılan qolların sayına baxmaq lazım gələcək ki, burda ümumi hesab “qırmızı-ağlar”ın xeyrinədi – 13:7.

Deməli, paytaxt təmsilçisi çempion olmaq istəyirsə, “Araz-Naxçıvan”a azı 7 top fərqiylə qalib gəlməlidi ki, bunun üçün gərək möcüzə olsun. Təbii ki, bu ehtimallar hər iki komandanın qalan oyunlarda qalib gəlməsi üzərində qurulub. Qalan rəqiblərlə səviyyə fərqini nəzərə alsaq, favoritlərin uduzacağını düşünmək sadəlövhlük olar.

İş ondadı ki, mövsümə uğursuz başlayan Muxtar Respublika təmsilçisi bu uğurlara yalnız Yevgeni Kukseviçin təyinatından sonra nail oldu. Lakin rusiyalı mütəxəssisin uğurları bununla bitmir. O, həm də “Araz-Naxçıvan”ın Əmirhüseyn Rəsuli kimi bombardir araya-ərsəyə gətirməsində böyük pay sahibidi. Mövsüm ərzində 30 dəfə fərqlənən Rəsuli 36 qolla lider olan "Baku Fire"nin futzalçısı İaqo Henrikenin ən yaxın izləyicisidi.

Maraq üçün qeyd edək ki, ötən mövsüm “qırmızı-ağlar”ın hansısa oyunçusu bombardirlər siyahısının ilk üç pilləsində yer almayıb. Odu ki, Kukseviçli “Araz-Naxçıvan”ın Çempionlar Liqasına gedəcəyi təqdirdə əvvəlki illərə nisbətən daha ciddi uğurlar qazanacağını düşünə bilərik. O başqa məsələ ki, naxçıvanlılar Rəsulidən möhkəm yapışmalıdı. Axı komandanın mövsüm ərzində vurduğu 165 qolun 30-u məhz onun payına düşür.

KƏNAN BAHADIR