Futbol üzrə ölkə çempionatının 1-ci liqasında 24-cü tur da geridə qaldı.

Bilindiyi kimi, bu yarışda nəinki çempionun, premyer-liqaya vəsiqə qazanan komandaların belə adları bəlli olub. Amma belədə intriqanın bitdiyini, qalan matçların formal xarakter daşıdığını düşünə bilmərik. Ona görə ki, hələ turniri hansı komandanın tərk edəcəyinə aydınlıq gəlməyib. Həmçinin "Karvan"la "İmişli" arasında 2-ci yer uğrunda gərgin mübarizə getdiyinin də fərqindəyik. Odu ki, sözü çox uzatmadan detallara keçid almaq yerinə düşər.

Turun açılış matçında "Cəbrayıl" "Baku Sportinq"i qəbul etdi. Qarabağlılar hər iki hissədə üstün oyun sərgilədi ki, hadisələrin axarı bakılıların uduzmasıyla, həmçinin qələbə həsrətinin 7 oyuna çatmasıyla nəticələndi. İnamlı oyunla qələbə qazanan meydan sahiblərinin çətin dönəmdə xal ehtiyatını artırması komanda üçün yetərincə xoş xəbərdi. "Cəbrayıl" indi yüksək əhval-ruhiyyə ilə növbəti oyuna hazırlaşa bilər. "Difai"nin "doğma divarlar" arasında "Mingəçevir"lə qarşılaşdığı oyun Ağsu təmsilçinin böyükhesablı məğlubiyyətiylə nəticələndi. Qonaqların ilk dəqiqələrdən təşəbbüsü ələ alması və bunu erkən qolla tabloya "köçürməsi" "fədailər"in qalan vaxtda daha üç qol buraxmasına gətirib-çıxardı. Təsəlli qoluna penalti sayəsində imza atan meydan sahibləri üçün təhlükəli günlər davam edirsə, 5-ci pilləyə yüksələn mingəçevirlilər böyük sevinc içindədi.

Ardınca daha iddialı komandaların duelini izlədik. "İmişli" - "Qaradağ Lökbatan" matçında möcüzə yaşanmadı. Fərid Namazovun komandası 1-ci liqada qalmaq üçün çırpınan rəqibi evdə məğlub etməklə ikinci sıradakı mövqeyini möhkəmlətdi. "Zaqatala" - MOİK qarşılaşmasına gəlincə, burda meydan sahibləri qalib gəldi. Rüstəm Məmmədovun bir zamanlar premyer-liqaya yüksəlmək həvəsində olan komandası "hərbçilər"i yenməklə çempionatı tərk etmək təhlükəsini xeyli sovuşdurdu. MOİK də arxayınlaşmaq istəyirsə, ya daha çox xal qazanmalı, ya da aşağı sıralarda qərarlaşan rəqiblərinə pis günlər arzulamalıdı.

Təbii ki, turun “şah əsəri” "Karvan" - "Qəbələ" matçı idi. Yevlaxlılar axır ki "qırmızı-qaralar"ı məğlub etməyin formulunu tapdı, iki cavabsız qolla qalib gəldi. O başqa məsələ ki, Kaxaber Sxadadzenin çempion komandası meydanda xeyli arxayın göründü. İstənilən halda, Kənan Kərimovun yetirmələri vacib qələbə qazanmaqla 2-ci pilləni “İmişli”yə vermək niyyətində olmadığını bir daha göstərdi. Bizi son turlarda bu baxımdan çox maraqlı mübarizə gözləyir.

1. Qəbələ 24 18 4 2 46-7 58
2. İmişli 24 14 5 5 40-19 47
3. Karvan 24 13 7 4 50-30 46
4. Zaqatala 24 7 10 7 32-29 31
5. Mingəçevir 24 7 7 10 25-34 28
6. MOİK 24 7 5 12 27-40 26
7. Baku Sportinq 24 7 5 12 20-41 26
8. Cəbrayıl 24 7 4 13 23-30 25
9. Difai 24 6 4 14 32-49 22
10. Qaradağ Lökbatan 24 5 7 12 25-41 22

Bombardirlər: Emil Qasımov (Karvan) - 14, Bəhruz Teymurov (Karvan) - 13, Domi Massumo (Qəbələ) - 12.

Növbəti turun oyunları mayın 8-9-da keçiriləcək: Qəbələ - Cəbrayıl, Baku Sportinq - Difai, Zaqatala - Karvan, Qaradağ Lökbatan - MOİK, Mingəçevir - İmişli.

KƏNAN BAHADIR