Aprelin 21-də Bakının Kürdəxanı qəsəbəsində “Turan Tovuz”un inşa etdirdiyi bazadakı təbii örtüklü meydançaların açılış mərasimini keçirdi. Biz illərdi belə açılışların həsrətində olmuşuq. Gözümüz süni örtüklü meydançalardan, elə meydançaların örtüyü kimi süni əməllərdən, mərasimlərdən yorulub. Ona görə də indi təbii örtüklü meydançaların açılışını görəndə sevinirik, ürəyimizdə ümid işıqları yanmağa başlayır. Özü də bu işləri klublarımız görməyə başlayanda sevincimiz ikiqat olur. Elə “Turan Tovuz”un təşəbbüsünü də buna görə alqışladıq.

Ümumiyyətlə, Ehtiram Quliyev “Turan Tovuz”a rəhbərlik etməyə başlayandan bəri qərb klubu canlanıb. Klubun akademiyası fəaliyyətə başlayıb, uşaq futboluna diqqət artırılıb. Mən bir dəfə də bu barədə yazmışdım, Ehtiram bəyin futboldan əvvəlki fəaliyyətiylə də yaxşı tanışam. Bilirəm ki, 44 günlük Vətən Müharibəsi dövründə Quliyev daim ordumuzun yanında olub, xüsusilə də yaralı əsgərlərimizin döyüş meydanından çıxarılması üçün təcili yardım maşınlarının təminatı, ön cəbhədə çalışan həkimlərimizin iş şəraitinin yaxşılaşdırılması üçün əlindən gələni edib. Kəlbəcər azad ediləndən sonra orda hərbi xəstəxananın yaradılması üçün də Ehtiram Quliyevin təşəbbüs göstərdiyini, maddi və mənəvi baxımdan böyük işlər gördüyünü yaxşı bilirəm. Ona görə də Ehtiram bəyin Azərbaycan futboluna səmimi qəlbdən dəstək olacağına, “Turan Tovuz”un və Tovuz futbolunun dirçəlməsi üçün əlini daşın altına qoyacacağına şübhə etməmişəm.

Bəli, Ehtiram bəy bu sahədə təcrübəsizdi. Ona görə də müəyyən addımlarını xırda səhvlərlə atması mümkündü. Konkret desəm, mən onun rusiyalı mütəxəssis Kurban Berdıyevlə anlaşmasını bəyənməmişəm. Bunu da gizlətmirəm. Addım-addım inkişaf yolunu seçən klub təqaüd yaşındakı əcnəbi çalışdırıcıya yox, yerli mütəxəssislərdən birinə tapşırılmalıydı. Zaman da onu göstərdi ki, Berdıyev “Turan Tovuz”u yaradılan şəraitin qarşılığında gözləniləni verə bilmir. Xüsusən də legioner seçimində xeyli səhvə yol verildi. Komandanın ən faydalı futbolçularından biri Otto Conun mövsümün gedişində elə də böyük olmayan məbləğin qarşılığında satılması da şəxsən məndə təəccüb doğurdu, o qalsaydı, indi tovuzlular çoxdan turnir vəzifəsinin öhdəsindən gələ bilərdi.

Bütün bunlar öz yerində. Qayıdaq “Turan Tovuz”un Kürdəxanıdakı meydançalarının açılış mərasiminə. Bu tədbirdən çəkilən şəkillərə baxdım. Ehtiram bəyin yanında millət vəkilləri dayanmışdı. Amma AFFA və PFL rəsmilərindən kimsə gözə dəymədi. Halbuki təxminən bir ay əvvəl Tovuzdakı inzibati binanın açılışı zamanı AFFA-nın baş katibi Cahangir Fərəcullayev, baş katibin müavini Kamran Vəliyev, Peşəkar Futbol Liqasının texniki-idman direktoru Elgiz Abbasov, Futbolun İnkişaf Fondunun icraçı direktoru Tural Piriyev ön sırada yer alırdı. Fərəcullayev qırmızı lenti Ehtiram Quliyevlə birlikdə kəsmişdi. Buna görə də Kürdəxanıdakı tədbirdə AFFA və PFL rəsmilərini görməyib, təəccüblənmişdim. Düşünmüşdüm ki, Tovuza getməyə ərinməyən cənablar Kürdəxanıya getməyə həvəs və güc tapmayıblar. Hətta bu barədə məqalə də yazmış, sizinlə paylaşmışdım.

Sən demə, hər şey göründüyü kimi deyilmiş. AFFA-nın İnformasiya və İctimaiyyətlə Əlaqələr departamentinin rəhbəri Elnur Məmmədli ölkə mətbuatına açıqlamasında həmin tədbirə dəvət almadıqlarını, dəvət olacağı halda iştirak etmək üçün heç bir problemin olmadığını bildirdi. Bu açıqlamanı görəndən sonra özüm də Elnur bəylə bir daha dəqiqləşdirdim və əmin oldum ki, “Turan Tovuz” Kürdəxanıdakı tədbirdə AFFA ilə PFL-dən heç kimi görmək istəməyib. Əvəzində millət vəkilləri önə çəkilib, bununla da tədbirin səviyyəsini yüksək göstərməyə çalışıblar. Səbəbini bilmirik. Görünən odu ki, Şamaxıdakı oyunun VAR sistemi olmadan keçirilməsinin, bunun davamında verilən bəyanatın və ondan sonra da Tovuz klubuna kəsilən cərimənin incikliyi davam edir. Xırda məqamlar üzərində çox da dayanmaq istəmirəm. Ümid edirəm ki, bu cür umu-küsülər, incikliklər çox davam etməyəcək. Çünki bundan nə klubla AFFA xeyir görəcək, nə də Azərbaycan futbolu. Yeni cəbhə açmağa ehtiyac yoxdu.

AMAL