"Neftçi" Misli premyer-liqasının 32-ci tur matçında "Sumqayıt"ın meydanından "sülh"lə ayrıldı - 2:2.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- İki fərqli hissə izləməyimizin səbəbi nə oldu?
- Mən belə düşünmürəm. İlk dəqiqələrdən diqtə edən tərəf olmağa çalışırdıq. Bir neçə dəfə təzyiq göstərdikdən sonra topu almağı bacardıq. Sadəcə, düzgün qərarlar verə bilmədik. Rəqib ilk hücumunu qolla tamamladı. Bununla yanaşı, hakim idarəçiliyi böyük problemə çevrildi. Son vaxtlar üzərimizdə təzyiq çoxdu. Kimsə istədiyini edə bilməz. Bu gün hakim oyunu ələ ala bilmədi. Topdaşıyanlar topu gec verdi, oyunun tempi aşağı düşdü. Ağadadaşın sayılmayan qolu... Planşetdə epizodlara biz də baxırıq. Ola bilər ki, VAR otağında başqa görüntülər var. Təmiz qol idi. Ancaq sayılmadı. Bu gün hesabda geriyə düşsək də, qollar vurub heç-heçə etdik. Futbolçularım sağ olsun.

- Bəzi futbolçular özünü yaxşı tərəfdən göstərməyə çalışır, bəziləri isə sanki "Neftçi"dən əllərini üzüb...
- Peşəkar liqadayıq. Heç kimin aqibəti bilinmir. Hansısa futbolçunun təslim olmağa ixtiyarı yoxdu. Rəğbət qazanmaq üçün oynamalısan. Komandanı oyunlara kökləmək çətindi. Problemləri bilirik. Bu gün qapanan komandaya qarşı oynadıq. Futbolçularımız başqa klublardan maddi durumuna görə seçilir. "Neftçi"nin müdafiə olunması, rəqibin hücum etməsi yolverilməzdi.

- Növbəti mövsüm üçün beyninizdə hansı planlar var?
- Gələcəklə bağlı planlar qururuq. Futbolçu axtarışındayıq. 

- İtkilər oyununuza təsir etdi?
- "Sabah"la oyunda Emin zədələndi. Mövsümü erkən başa vura bilər. İki aydı oynamırdı. Çox güc sərf etdiyi üçün ayağında problem yarandı. Bəlkə də yaşla bağlıdı. Ümumiyətlə, orta xətdə oyunçularımız çoxdu. Amma Quzzo, Ohori və Emil zədəlidi.

KƏNAN BAHADIR