"Qarabağ" Misli premyer-liqasının 32-ci tur matçında "Sabah"ın meydanından "sülh"lə ayrıldı - 1:1.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Bir il əziyyət çəkib uğur qazandılar. Çox sevincliyəm. 12-ci çempionluğumuzdu. Belədə futbolçuların istəkli olması çox vacibdi. “Sabah”a qarşı əsl çempionluq oyunu keçirdik. Hər iki komanda ağıllı oyun göstərdi. Bu stadionda oynamaq həmişə xoşdu. Azarkeşlərimizi təbrik edirəm. Onlar bunu haqq etdi. Hər zaman bizimlə oldular. “Sabah”a uğurlar arzulayıram. Onların da azarkeşlərinə təşəkkür edirəm. Tribunalarda gözəl mənzərə var idi.

- Futbolçular elə sevinirdi ki, sanki çempion olmağa öyrəşiblər...
- Belə anlarda futbolçulara motivasiya vermək vacibdi. Onların arzusu olmasa, tempi saxlamaq çətin olar. Bu gün qalib gəlmək istəyirdik. Əlbəttə, hər uğurun ilki daha ləzzətli olur. Amma mən həmişə növbəti uğuru daha çox əldə etmək istəmişəm. Bəlkə də futbolçular çox sevincli görünmürdü. Mənin üçün önəmli olan meydançada baş verənlərdi.

- Əvvəlki oyunlarda çox oynamayan futbolçulara şans vermişdiz. Səbəb kubokun finalında da "Sabah"la qarşılaşmağınızdı, ya qalan oyunçulara istirahət vermişdiz?
- Heyəti tam dəyişmişdik. "Araz-Naxçıvan"la oyunda da bəzi futbolçular yorğun idi. Bu gün meydana çıxan bütün futbolçulara bir daha təşəkkür edirəm. Uzun müddət oynamadıqdan sonra 90 dəqiqə ərzində dinamikanı qoruyub-saxlamaq, məsuliyyətli çıxış etmək çətindi. Amma bunu bacardılar.

- "Qarabağ"ın yayda heyətdə köklü dəyişikliklər edəcəyi iddia olunur...
- Köklü dəyişikliklər bir az ağır ifadədi. Duruma uyğun addım atmaq istəyirik. Çalışdığım futbolçuları komandadan göndərmək istəmirəm. Hamısı əziyyət çəkib, uğurlarımız üçün can yandırıb. Yenə də komandaya yeni nəfəs vermək, daha da fəallaşdırmaq, gücləndirmək şansımız olsa, mütləq bu addımı atacağıq. İndi kimisə göndərmək yox, yeni futbolçular almaq haqda düşünürük. Kollektivdə həmişə 24-25 futbolçu olub. Bu gün cəmi 20 oyunçu var. Gedənlərin yeri boş qalıb. Hər halda, köklü dəyişiklikdən söhbət getmir.

- "Sabah"ın oyunu barədə nə deyə bilərsiz?
- "Sabah"ın oyunun həmişə dəyərləndirmişəm. Çox sürətli, texnikalı hücum xətti var. Komanda təcrübəli yarımmüdafiə və müdafiə xəttinə sahibdi. Bu rəqibə qarşı yaxşı oyun götərmək üçün daha çox hazırlaşmalıyıq. Çox düşünülmüş hücumları var. Bu gün ani diqqətsizlikdən qapımızda qol gördük. "Sabah"ın oyun sisteminə, klubun iş prinsipinə çox müsbət yanaşıram.

- Klub prezidenti yayda 4-5 futbolçunun transfer ediləcəyini deyib. Gözaltı etdiyiniz oyunçular var?
- Rəhbərliklə bu haqda mütləq müzakirəmiz olacaq. Həmişə diqqətimizi daha çox yay "transfer pəncərəsi"nə yönəltmişik. Əlbəttə, gözaltı etdiyim futbolçular var. Amma əfsuslar olsun ki, bəzən istəyimizə çata bilmirik. Oyunçular son vaxtlar Avropaya daha çox meyillidi. Bizim kimi və ya bizdən bir az irəlidə olan futbol ölkələrində ümumi struktur daha yaxşılaşdırılıb, maliyyə baxımından da irəliləyiblər. Bu üzdən, futbolçuları bura gətirmək asan deyil. Həmişə demişəm ki, komandaya yeni nəfəs lazımdı.

- Fransa və Əlcəzair mətbuatının yazdığına inansaq, Yassin Benzya Kadi Borgesin gəlişindən sonra maaşının artırılmasını istəyir. Marko Veşoviçin də gedəcəyi iddia edilir...
- Benzyayla bağlı pul söhbəti doğru deyil. Burda belə şey olmayıb. Sadəcə hər futbolçunun müəyyən yaş dövründən sonra onların son addımı olur. Ola bilər ki, daha yaxşı təklif gözləyirlər, daha yaxşı çempionatda oynamaq istəyirlər. Ümumiyyətlə, Benzya və Veşoviçlə pul söhbətində hansısa narazılıq yoxdu. Hamısının özlərinə xas ədəb-ərkanları, əxlaqları var. Futbolçular bacarıqlarına görə danışıqlarda fikirlərini bildirirlər. Futbolçunun karyerası qısadı. Onlar hansısa təkliflərə baxmayaraq, burda çıxış edirlərsə, klubun uğuru üçün öz güclərini hər oyun sona kimi sərf edirlərsə, mən də onlarla ortaq məxrəcə gəlməliyəm.

- Çempionlar Liqasında hədəf nə olacaq?
- İndiyə qədər hər turnirdə maksimum uğur əldə etməyə çalışmışıq. Hər il daha yaxşısını etmək istəmişik. Amma bu haqda hələ danışa bilmərəm.

KƏNAN BAHADIR