Vinisius Junior yalnız yaşıl meydanda yox, ondan kənarda da fəallığı ilə diqqəti cəlb edir. “Real”ın oyunçusu FİFA-nın Etika Məcəlləsini pozmaqda şübhəli bilinir.

"Football-plus.az" xəbər verir ki, ali futbol qurumu Vinisiusu ikiillik müddətə qədər cəzalandıra bilər. Buna səbəb kimi braziliyalı futbolçunun agenti olan atası Tassilio Soareşin rəhbərlik etdiyi “All Agenciamento Esportivo” şirkəti vasitəsilə peşəkar futbol klublarının səhmlərini alması göstərilir.

“Tiberis Holding do Brasil” şirkəti ata və oğuldan FİFA-nın Etika Komitəsinin İstintaq Palatasına şikayət edib. Şirkətin rəhbərliyi Vinisiusun hazırda futbolçu olduğunu və onun bu fəaliyyətinin maraqların münaqişəsinə səbəb ola biləcəyini vurğulayıb. Toplanan materiallara əsasən, ulduz futbolçu hazırda Braziliyada və Portuqaliyada bir sıra klubların həmsahibidi. Onun İspaniyada adı çəkilməyən bir klubun səhmlərini almağa hazırlaşdığı da iddia edilir.

FİFA Etika Məcəlləsini pozduğunu sübut edəcəyi halda Vinisiusu yaşıl meydanlardan iki il müddətinə kənarlaşdıra bilər. Futbolçu bu halda yüksək məbləğdə cərimə ödəməli və klublardakı səhmlərini satmağa da məcbur ediləcək.