“Liverpul” liderlərini saxlaya bildi
Salahın ardından Van Diyk də yeni müqaviləyə imza atdı
"Football-plus.az" xəbər verir ki, “Liverpul”un 33 yaşlı müdafiəçisi Vircil van Diyk klubla müqavilə müddətini 2027-ci ilə qədər uzadıb. Bununla bağlı xəbər srağagün “qırmızılar”ın rəsmi saytında yer alıb:
“Kapitan müqaviləyə imza atdı – o, klubda keçirdiyi 7,5 ildən sonra da “Liverpul”u təmsil etməyə davam edəcək”.
“Qırmızılar” Van Diyklə müqavilə müddətinin uzadılmasını sosial şəbəkələrdə geninə-boluna anons edir – bir neçə maraqlı mənzərə var. Vircil burda qazandığı uğurların əks olunduğu fotoların əhatəsində yer alıb. Klubun yaydığı videoçarxda Van Diyk emosiyalarını bölüşüb:
“Enfild” evdi. Mənim üçün, ailəm üçün. Şəhəri, klubu, fanatları, komanda yoldaşlarımı sevirəm. Səni təcəssüm edən hər şeyi sevirəm, “Liverpul”.
Vircil klub saytına müsahibədə də müqavilə müddətinin uzadılmasıyla bağlı danışıb:
“Xoşbəxt və qürurluyam. Sadəcə, qeyri-adi hadisədi. Qət etdiyim yol və onu daha iki il uzatmaq imkanı... Möhtəşəmdi”.
Van Diykin dediyinə görə, şəhər onun üçün doğmalaşıb:
“Mən həmişə “Liverpul”u arzulamışam, həmişə. Bu haqda daim düşünmüşəm. Bu şəhərin mən və ailəm üçün uyğun yer olduğuna heç vaxt şübhə etməmişəm. Mən Liverpuldanam. Kimsə yaxınlarda məni övladlığa götürülmüş skauzer adlandırmışdı. Bunu eşidəndə həqiqətən də qürur duyuram”.
Kapitanın müqaviləsi ilə bağlı tarixçə yaxşı bitdi. Halbuki bir neçə gün əvvələ qədər Van Diykin komandada qalıb-qalmayacağı aydın deyildi. “Qırmızılar” martın ortalarında Çempionlar Liqasında mübarizəni dayandırandan sonra niderlandlı müdafiəçi jurnalistlərə belə demişdi:
“Növbəti mövsüm nə olacağını bilmirəm. Kimsə bildiyini deyirsə, deməli, sizə yalan danışır. Müqavilə ilə bağlı danışıqlar dayandırılıb? Heç nə dayandırılmayıb. Artıq demişəm: hansısa xəbər olan kimi biləcəksiz. İndi isə heç özüm də nəyin necə olacağını bilmirəm”.
Aprelin əvvəlində də niderlandlı ehtiyatlı danışmışdı:
“Danışıqlarda tərəqqi var. Qalacammı? Bilmirəm. Baxarıq”.
Xatırladaq ki, Vircil “Liverpul”a 2018-ci ildə “Sauthempton”dan keçib və həmin vaxtdan bəri “qırmızılar”ın əfsanəsinə çevrilməyə başlayıb. İndiyə qədər bu komandanın formasında 300-dən artıq oyun keçirib, 27 qol vurub, premyer-liqa, Çempionlar Liqası və Avropa Superkuboku da daxil olmaqla 7 titul qazanıb.
Ümiyyətlə, aprelin ortaları “Liverpul” fanatlarına sevindirici xəbərlər bəxş edib. Axı Van Diykdən bir neçə gün əvvəl Məhəmməd Salah da müqaviləsini yeniləyib. 32 yaşlı hücumçu da müqavilə müddətini ikiilliyə uzadıb.
Misirli komandada qaldığına görə şaddı: “Əvvəllər də əla komandamız var idi. Ancaq indi müqavilə bağladım və titullar qazanmaq şansımızın olduğuna əminəm. Yenə də öz oyunumdan həzz ala biləcəm. Səkkiz ildi bu klubdayam, 10 ilə çatacağıma ümid edirəm. Ən yaxşı illərimi burda keçirmişəm”.
Vircildən fərqli Salah yeni müqavilə ilə bağlı durumu müntəzəm şərh edirdi. Misirli ötən ilin noyabrında gileylənmişdi:
“Demək olar ki, dekabr qapıdadı, mən isə hələ də klubda qalmaqla bağlı heç bir təklif almamışam. Yəqin ki, daha çox komandadan kənardayam, nəinki komandanın içində”.
Yanvarda isə əlavə etmişdi ki, danışıqlarda heç bir tərəqqi yoxdu. “Liverpul” Salahla müqaviləni yeniləyəndən sonra onun məlum replikası üzərində yaxşıca oynadı. Hücumçunun fotosunun altında bu sözləri yazdı:
“Daha çox komandanın içində, nəinki çölündə”.
Son həftələrin müsbət xəbərlərinə baxmayaraq, çox güman, “Liverpul” mövsümün sonunda bütün liderlərini saxlaya bilməyəcək. Dünyaca məşhur insayder Fabritsio Romanonun yaydığı xəbərə görə, mövsümün sonunda müqavilə müddəti bitəcək 26 yaşlı müdafiəçi Trent Aleksander-Arnold “Real”ın yolunu tutacaq.
Onu da xatırladaq ki, “Liverpul” 32 turdan premyer-liqanın zirvəsində qərarlaşıb. “Qırmızılar” ən yaxın izləyicisini – “Arsenal”ı 13 xal qabaqlayır.
Digər xəbərlər
