Zaur Axundovu yaxşı tanıyırsız. Bir vaxtlar “Keşlə”nin rəhbəri idi. Sonra komandanı onun əlindən alıb, əyalətə göndərdilər. Adını da qoydular “Şamaxı”.

Həmin vaxt Axundov demişdi ki, futboldan yorulub, bu sahədən uzaqlaşır. Amma dediyi kimi olmadı. Ötən ilin iyulunda Zaur bəy Naxçıvan Futbol Federasiyasının sədri seçildi. Yaxşı bilirik ki, “Araz Naxçıvan” da onun nəzarətindədi. Düzdü, sənəd üzərində qardaşının adını yazdırıb. Heç özü də bunu gizlətmək fikrində deyil. Mövsümün əvvəlində demişdi ki, Elmar Baxşıyevə vaxt qoyub, həmin müddət ərzində baş məşqçinin nəticələrini bəyənməsə, onu qovacaq. Hədə-qorxu işə yaradı. “Araz Naxçıvan” mövsüm başlayandan hamını təəccübləndirməyi bacardı. Avrokuboklara vəsiqə, demək olar ki, təmin edilib.

Zaur bəyin fəaliyyəti təkcə Naxçıvan və onun adını daşıyan komanda ilə məhdudlaşmır. Zaur Axundov düz 17 ildi Futzal Federasiyasının prezidentidi. Vaxtilə Braziliyadan “vaqon-vaqon” futzalçı və məşqçi gətirirdi. Uğurlar bir-birinin ardınca gəlirdi. Biz də həmin yalançı uğurlardan feyziyab olmuşduq. Elə düşünürdük ki, həmişə belə olacaq, Azərbaycan futzalı həmişə Avropada və dünyada adından söz etdirəcək, böyük turnirlərə qatılmağın həyəcanını yaşayacağıq. İş o yerə çatmışdı ki, Zaur bəy onu kütləvi “milliləşdirməyə” görə qınayanlara kobud cavablar verirdi. Deyirdi ki, lazım gəlsə, lap Həbəşistandan da futzalçı gətirib, Azərbaycan millisinin formasını geydirəcək. Təki Azərbaycanın üçrəngli bayrağını yüksəltsin.

Biz deyirdik ki, belə yalançı uğurlarla, kütləvi “milliləşdirmə” ilə başımızı aldadıb, milyonları havaya sovurmayın. O pulları təmələ xərcləyin, qoy öz gənclərimiz yetişsin. Dinləyən olmadı. Çünki Zaur bəyin də daxil olduğu məlum qruplaşma müvəqqəti uğurun dalınca qaçır, böyük futbolda olduğu kimi yanlış yolda yürüyüb, xalqı aldatmaqla məşğul olurdu. Pul qurtardı, uğur da qurtardı. UEFA və FİFA da “milliləşdirmə” ilə bağlı qaydaları sərtləşdirdi. Azərbaycan futzalı da birdən-birə göyün yeddinci qatından yerə endi, hətta dərin bir çuxura düşdü. 2026-cı ildə keçiriləcək Avropa çempionatının seçmə oyunları bizim üçün əməlli-başlı fiaskoya çevrildi. Xorvatiya, Yunanıstan və İsveçin yer aldığı qrupda qələbəyə həsrət qaldıq.

Mən futzalçılarımızı qınaya bilmərəm. Onların bacardığı budu. İllərlə başımızı braziliyalılarla qatmayıb, onların inkişafı ilə məşğul olsaydıq, indi bu acınacaqlı mənzərəyə üzülməzdik. Yəqin ki, Zaur Axundov da bu nəticələrə baxıb utanır. Hə, bu müqayisəni heç xoşlamasaq da, deməliyik ki, ermənilər futzalda da bizi ötüb keçdi. İllərlə, heç olmasa, bu sahədə onları qabaqlamağımızla öyünürdük. Artıq bu da yoxdu. Ermənilər Qazaıxtan, Danimarka və Albaniyanın yer aldığı qrupda heç məğlubiyyət üzü görmədilər, 16 xalla qrup lideri oldular. Adam baxır, köks ötürür. Halbuki vaxtilə adımız Avropa futzalında Portuqaliya, İspaniya kimi ölkələrlə yanaşı çəkilirdi, Qazaxıstan bizimlə rəqabət apara bilmək arzusuyla alışıb-yanırdı. Ermənilərin bizə çatması isə şirin bir xəyal idi. Bəli, xəyal idi, gerçək oldu. Ermənilər bizə nəinki çatıb, hətta ötüb keçiblər də.

Ümid edirəm ki, 17 ildi Futzal Federasiyasının prezidenti postunu tutan Zaur Axundov da nələrinsə dəyişməli olduğunu anlayacaq. Elə dəyişikliyə özünün əyləşdiyi kürsüdən başlayacaq. Artıq futzalımız da futbolumuz kimi uçuruma gedir, bundan o yanası yoxdu.

AMAL