“Komanda Ərzurumdan, təlim-məşq toplanışından qayıdıb. Komanda ilə görüşdük, baş məşqçi Elmar Baxşıyevlə söhbətimiz oldu. Məni tanıyırsız, idmanda ambisiyalı, iddialıyam. Uduzmağı da sevmirəm, haqsızlığı da. Düzdü, hərdən emosional oluram. Lakin yaş keçdikcə vəziyyət dəyişir. 15 il əvvəlki Zaurla indiki arasında fərq var. Cavan vaxtı emosional idim, hakimlərlə də mübahisələrim olub. Odu ki, “Araz-Naxçıvan”dan da uğur gözləyirəm. Elmar Baxşıyevin də qarşısına iddialı olmaq şərti qoyulub. İstədikləri bütün transferlər reallaşdırılıb. 99 faiz arzulanan komanda yığılıb. Axsayan bircə yer var, o da müdafiənin mərkəzidi. O mövqe üçün də axtarışlarımız davam edir. İlk tura da olmasa, 2-ci, 3-cü tura qədər bu məsələ həll olacaq. Bir sözlə, lazım olan şərait yaradılıb. Elmar Baxşıyevə inanıram. Məşqçinin uğur qazanması üçün əlində material olmalıdı. Lazımi heyət olmayandan sonra lap Mourinyonu da gətirsək, xeyri yoxdu. Mən “Keşlə”də də olanda hədəf Avropa idi, fərqi yoxdu bu nəticə kubokdan qazanılır, ya çempionatdan. Biz heç vaxt komandanın qarşısına altılığa, yaxud səkkizliyə düşməyi hədəf qoymamışıq. “Keşlə”də (indiki “Şamaxı”) 5 ildə 2 dəfə kuboku qazandıq, bir dəfə də çempionatda üçüncü yeri tutduq. “Araz-Naxçıvan”ın avrokuboklara düşməsinin 80 faizi Naxçıvandan, ev oyunlarını orada keçirməyimizdən asılı olacaq. Qışa qədər yox, iki aya nəticə olmasa, Baxşıyevi yola salacağıq. Ancaq Elmara inanıram. İşləməsi və nəticə qazanması üçün əlində yaxşı material var. Qalanı texniki məsələdi”.

“Təxminən 5-6 ay öncə klubdan ayrıldığı zaman Azər Bağırovdan soruşmaq lazım idi ki, “səni istefaya kim göndərib?" Əsas məsələ budu. O zaman bu sual ortalığa qoyulmalıydı. Bu, məsələnin bir tərəfi. Yəni bir müddət öncə Bağırovu istefaya göndərən şəxs indi də Elmar Baxşıyevə vaxt qoya bilər. Bu, mənim üçün “Araz-Naxçıvan”ın idarəçiliyində normal bir şeydi. Bəlkə də futbol prinsiplərinə uyğun deyil. Ancaq fakt faktlığında qalır.

Mənə görə “Araz-Naxçıvan”ın ən yaxşı dönəmi Vüqar Abbasov klubun prezidenti olduğu vaxt idi. Vüqar müəllimin dönəmində çox mükəmməl bir komanda idarəçiliyi var idi. Bunun bariz nümunəsi də o idi ki, biz divizionun qalibi olduq. Tam dəqiqliklə deyə bilərəm ki, Vüqar Abbasov klubdan uzaqlaşmadı, bezdi. Bu, çox təəssüf doğuran haldı. Çünki, orda avantürayla məşğul olan, futboldan anlayışı olub, lakin ora sevgiylə yox, sırf iş yeri kimi yanaşan adamlar var idi. Çox əfsuslar olsun ki, Vüqar müəllim klubdan iyrəndi. Hesab edirəm ki, “Araz-Naxçıvan”ın müstəqillik illərindəki sonuncu ən yaxşı dönəmi Vüqar müəllimin vaxtında oldu. Çox təəssüflənirəm ki, Vüqar Abbasov klubda yoxdu”.

“Əslinə qalsa, Vüqar müəllimin stadionun təmir olunmasıyla bağlı layihəsi var idi. Sadəcə, onu futboldan iyrəndirdilər, onun üzərində avantüra qurdular. Yoxsa o stadion həmin müddətdə təmir olunacaq və azarkeşlər Naxçıvanda komandanın premyer-liqadakı oyunlarına baxacaqdılar. Daha bu qaldı. İndiki duruma gəlincə, stadion düzəltmək heç də asan məsələ deyil. Bu, 2-3 ayda həll olunacaq bir iş deyil. Heç yaxın müddət ərzində də bunu gözləmirəm. Çünki “Araz-Naxçıvan” stadionunun düzəldilməsi uzun zaman aparacaq. İndi bunu layihə kimi ortalığa qoyurlar. Lakin bu nə dərəcədə gerçəkdi, bilinmir. Bunu da zaman göstərəcək. Həm də bilmək olmur ki, stadionun düzəldilməsi “Araz-Naxçıvan”ın ora qısa müddətdə dönməsi deməkdi, ya yox. Hesab edirəm ki, komanda bu mövsüm də yeni stadiona köçməyəcək”.