Bilindiyi kimi bu il Çempionlar Liqasının finalına Almaniyanın Münhen şəhəri ev sahibliyi edəcək.

''Football-plus.az'' xəbər verir ki, həlledici oyun mayın 31-də bu şəhərdə yerləşən ''Alyants Arena'' stadionunda keçiriləcək.

Bu arada finaldan öncə stadionda baş tutacaq qısa konsertlə bağlı detallar məlum olub. Bu il fanatları ''Linkin Park'' qrupu əyləndirəcək. Amerikanın bu məşhur rok qrupu ÇL-in himni ilə bağlı yeni bir remiks hazırlayıb. Qrup həmin remiksi finaldan öncə təqdim edəcək və başqa məşhur mahnılarını da ifa edəcək.

Qeyd edək ki, hələ 1996-cı ildə yaradılan ''Linkin Park'' qrupu özünəməxsus səsi ilə böyük populyarlıq qazanan vokalisti Çester Benninqtonun 2017-ci ildə intihar etməsindən sonra fəaliyyətini bir neçə il dayandırmışdı. Amma ötən ilin sentyabrında qrup yenidən fəaliyyətini bərpa etdiyini açıqlayaraq çoxsaylı fanatlarını sevindirdi. Qrupa yeni xanım vokalist Emili Armstronq və barabançı Kolli Britten əlavə olundu. Yenilənmiş heyətlə ''Linkin Park'' artıq bu yaxınlarda ''From Zero'' adlı albom da buraxıb.