Ötən ilin yanvarında “Qarabağ”dan ayrılan və legioner həyatı yaşamağa qərar verən Rahil Məmmədovun işləri yolunda getmir.

Xatırladaq ki, 2018-ci ildən “köhlən atlar”ın şərəfini qoruyan futbolçu əvvəl LKS-ə (Polşa) keçdi. Lodz təmsilçinin heyətində mümkün 16 matçın hamısında start heyətində meydana çıxan həmyerlimiz yayda Polşanın digər yüksək liqa kubu “Radomyak”la 2 illik müqaviləyə imza atdı. Elə karyerasındakı eniş də burdan başladı.

Rahil yeni komandasının heyətində 28 tur ərzində cəmi 10 oyunda start heyətində meydana çıxıb. 2 matçda sonradan şans qazanan futbolçu 5 görüşdə əvvəldən sonra ehtiyat oyunçular skamyasında əyləşib. Qalan 11 qarşılaşmada adı iştirak ərizəsinə salınmayıb. Ümumiyyətlə, həmvətənimiz sonuncu dəfə 2 ay əvvəl, daha dəqiqi, fevralın 15-də meydanda görünüb.

Belə düşünmək olar ki, artıq Rahil “Radomyak” üçün nəinki aparıcı futbolçu deyil, hətta ona ehtiyac da duyulmur. Əlbəttə, belədə onun tezliklə komandadan ayrılacağına şübhə yoxdu. Bəs, yeni ünvanı hara olacaq? Böyük xəyallarla ölkədən ayrılıb əli ətəyindən uzun üstümüzə qayıdanlar sırasına qoşulacaq, yoxsa legioner həyatına davam edə bilmək üçün başqa çıxış yolu tapacaq? Bunu öyrənmək üçün gözləmək lazımdı. Çünki Rahil zənglərə və mesajlara cavab vermir.

KƏNAN BAHADIR