Bakıda peşəkar boks gecəsi olacaq!
İyunun 21-də Bakı Kristal Zalında “UFC Fight Night” keçiriləcək. Azərbaycan ilk dəfə dünyaca məşhur UFC (Ultimate Fighting Championship) turnirinə evsahibliyi edəcək.
"Football-plus.az" xəbər verir ki, tədbir UFC, Azərbaycan Respublikasının Gənclər və İdman Nazirliyi və Bakı Şəhər Halqası Əməliyyat Şirkətinin birgə əməkdaşlığı ilə təşkil olunacaq. Turnirin əsas qarşılaşmasında UFC yarımağır çəki dərəcəsinin sabiq çempionu Camal Hill ilə Xəlil Raundtri Jr. üz-üzə gələcək.
Gecənin biletləri aprelin 25-i, səhər saat 10-da “iTicket” platformasında satışa çıxarılacaq. “UFC Fight Club” üzvləri üçün erkən satış aprelin 23-də, öncədən qeydiyyatdan keçən şəxslər üçün isə aprelin 24-də başlayacaq.
UFC prezidenti və baş icraçı direktoru Dana Uayt ilə gənclər və idman naziri Fərid Qayıbov əməkdaşlıq haqqında razılaşma imzalayıb. İmzalanma mərasimi Mayamidə keçirilən UFC 314 turniri zamanı keçirilib. Uayt əməkdaşlıqla bağlı fikrini bölüşüb:
“Azərbaycan və onun paytaxtı Bakı beynəlxalq idman tədbirlərinin keçirilməsi baxımından böyük tarixə malikdi. Bizim bu regiondan çıxan çox sayda güclü idmançımız var. Bu səbəbdən UFC-nin növbəti tədbirinin Bakıda təşkili təsadüfi deyil. İyunun 21-də Bakıda keçiriləcək debut tədbirini səbirsizliklə gözləyirəm”.
Gənclər və idman naziri Fərid Qayıbovun fikirləri:
"UFC-nin Bakıda keçirilməsi idman sahəsində Azərbaycanın regional liderə çevrilməsi istiqamətində atılmış növbəti mühüm addımdı. Prezident İlham Əliyevin davamlı diqqət və qayğısı, uğurlu idman siyasəti nəticəsində Azərbaycan dünyada idman ölkəsi kimi tanınır. UFC ilə bu yeni əməkdaşlıq ölkəmizin qlobal idman mərkəzi kimi mövqeyini daha da gücləndirir və idmanın inkişafı ilə beynəlxalq əməkdaşlığa sadiqliyimizi nümayiş etdirir".
Bakı Şəhər Halqası Əməliyyat Şirkətinin baş direktoru Maqsud Fərzullayev ölkəmizin təşkilatçılıq təcrübəsini vurğulayıb: "
Formula-1 ilə uzunmüddətli əməkdaşlığımızla yanaşı, UFC ilə tərəfdaşlıq Bakının idman dünyasında növbəti böyük uğurudu. Bu tədbir Azərbaycanın qlobal idman səhnəsindəki nüfuzunu daha da artıracaq. Biz UFC-nin döyüş növlərinin bölgədə inkişafına töhfə verməsindən qürur duyuruq və Bakını böyük beynəlxalq idman tədbirləri üçün əsas mərkəzə çevirməyə davam edirik".
Digər xəbərlər
