Futbol üzrə ölkə çempionatının 1-ci liqasında mübarizə aparan “Karvan” 44 dəfə rəqib qapılarına yol tapmağı bacarıb.

Maraqlıdı ki, 44 qoldan 24-ü iki futbolçunun hesabındadı. Bu gün həm Bəhruz Teymurov, həm də Emil Qasımov 12 qolla bombardirlik uğrunda yarışırlar. Bəhruzla bəzi məsələlər ətrafında söhbətləşdik.

- Komanda yoldaşınla bombardirlik uğrunda mübarizə aparmaq necə hissdi?
- Mən də bombardir olmaq istəyirəm. Bu hər bir futbolçunun arzusudu. İndiki vəziyyətdə bombardirlik yox, hər oyun meydana çıxıb, komandama qələbə qazandırmaq mənim üçün önəmlidi.

- Penalti qazansan, özün vurarsan, yoxsa komanda yoldaşına şans verərsən?
- Əlbəttə, penalti qazansam, Emilə verərəm. Emil cavandı, gələcəyi var. Onun bombardir olmasını istəyərəm.

- Çoxları “Qəbələ”nin səviyyəsinə görə digər 1-ci liqadakı qalan komandaları açıq-aşkar üstələdiyini düşünür. Bu fikirlə razısanmı?
- Düz fikirləşirlər. “Qəbələ”nin hər cür şəraiti var. Premyer-liqaya layiq komandadı. “Qəbələ”nin təkcə adı 1-ci liqadadı. Bütün şəraiti elita səviyyəsindədi. Çempionluğu layiqincə qazandı. Bütün komandalar da qəbullanır. Onları təbrik edirəm. Bizim də məqsədimiz mövsümü 2-ci yerdə bitirib, elitaya yüksəlməkdi. Premyer-liqanın atmosferi fərqlidi.

- “Karvan”ın elitaya gəlişi premyer-liqaya nə verəcək?
- Yevlaxda futbolu izləyənlər çoxdu. 1-ci liqada tamaşaçı sayına görə ilk pillədəyik. İndiki durumda valideynlər uşaqlarını futbola qoyur. Yaxşı oynayanlar da var. Özüm də iki oğlumu futbola cəlb etmişəm. Böyük oğlumu “Qəbələ” götürür.

- “Karvan”ın maliyyə durumu necədi?
- “Qəbələ”ni çıxmaq şərti ilə ən qəşəng baza bizdədi. AFFA-dan da gəlib baxıblar. Fikrimcə, bəyəndilər. Ot örtüyü problemimiz var. Rəhbərlik də hər şeyi edəcəyini deyir. Maliyyə baxımından problemimiz yoxdu. Maaşlarımızı vaxtında ödəyirlər.

- Başqa klublardan təklif olsa, gedərsən, yoxsa elitada məhz “Karvan”la oynamaq istəyirsən?
- Getmərəm. Premyer-liqaya yüksələndən sonra komanda məni saxlamaq istəsə, indiki kimi əlimdən gələni edərəm. Öz azarkeşlərimin qarşısında oynamaq və onları sevindirmək istəyirəm. Dövrələrarası fasilədə “Qəbələ”dən mənə təklif gəldi. Çempionun kim olacağı bilinmirdi. Amma mən komandamı qoyub getmədim.

- Azarkeşlərinizə nə demək istəyirsən?
- Aprelin 11-də ağır oyunumuz var. Onların dəstəyini gözləyirik. “İmişli”ni məğlub etmək, azarkeşlərə qələbə sevinci yaşatmaq istəyirik. Azarkeşlərimizə çox-çox təşəkkür edirəm. Hər oyun dəstək olurlar.

ƏSƏD SEYİDOV