"Turan Tovuz" Misli premyer-liqasının 29-cu tur matçında "Səbail"in meydanında heç-heçə etdi - 0:0.

"Football-plus.az" xəbər verir ki, bununla "bozqurd"un qələbə həsrəti 5 oyuna çatdı. Ümumiyyətlə, Kurban Berdıyevin avrokuboklara yollanmaq uğrunda mübarizə aparan komandası son beş matçda cəmi iki xal qazanıb.

Bayıl təmsilçisiylə qarşılaşmada itirilən xallar və bəzi futbolçuların, xüsusilə Veysəl Rzayevin onları tənqid edən azarkeşlərə sərt reaksiyası tərəfdarları özündən çıxarıb. Tovuzlular bu barədə fikirlərini klubun rəsmi "feysbuk" hesabının rəy bölməsində dilə gətirib. Sizi bəzi fikirlərlə tanış edirik.

Süleyman Qasımov: "Sadəcə, Alexandro Serranoya təşəkkür düşür, başqa heç biri bir qəpiklik oynamadı".
Amil Mehdiyev: "Komandanın oyun planı yoxdu. Ümumiyyətlə, nə oynadıqlarını bilmirlər. Cərimə etməkdən başqa heç nə eləmirlər. Əsəblərimizi korladız".
Ülvi İbrahimov: "Avropa-zad boş şeydi, yerinizdə oturun. Premyer-liqada qalmağa çalışan "Səbail"lə oyunda dəqiq zərbə vura bilmirsənsə, Avropada nə işin var? Bu oyunla Afrikaya gedə bilərsiz".
Tural Nəbi: "Şükür edin ki, bu il "Sabah" və "Neftçi" zəifdi".
Yaşar Mürsəlov: "Belə oyun və oyunçular ilə Avropada ancaq biabır olarıq".
İlkin İsmayılov: "İlk növbədə İman Həsənovu ayaqüstə, komandanın yanında görmək sevindirici idi. O kişi komandanın rəmzlərindən biridi. Oyun barədə danışmaq isə özünə zülm etməkdi. Olmayan şeydən necə danışasan? Komanda rəqib qapısına ilk zərbəni birinci hissəyə əlavə olunmuş dəqiqələrdə endirdi. İlk künc zərbəsi isə 57-ci dəqiqədə oldu. Hətta 1-ci liqada belə sönük oyunun olub-olmadığı mübahisəli məsəlidi. Rəhim Sadıxovun 90 dəqiqə meydanda olmasının səbəbini, yəqin ki, Berdıyevdən başqa heç kim bilmir. Yeganə təsəlli odu ki, Urtado çox keyfiyyətli müdafiəçidi. Oyundan sonra başverənlər isə tam bir rəzalət idi. Yerli oyunçulardan Veysəl, Sadiq, Mehman və Eltunun azarkeşlərə küçə söyüşləri söyməsi, hətta Veysəlin tribunaya qalxıb azarkeşləri vurmağa cəhd göstərməsi qudurğanlığın və tərbiyəsizliyin zirvə nöqtəsi idi. Hər nə olur-olsun, özünə peşəkar futbolçu deyən adamların bu hərəkətləri heç bir çərçivəyə sığmır. Komandanın bir çox əməkdaşı da hadisə yerindəydi. Ümid edirəm ki, onlar da oyunçular kimi ləyaqətsizlik etməyib klub rəhbərliyinə düzgün məlumat verəcəklər. Klub rəhbərliyi də lazımi tədbirlər görməsə, deməli, hələ görəcəyimiz günlər qabaqdadı. İki sektoru tovuzlu azarkeşlər doldurmuşdu və tam güclə komandaya dəstək olurdular. Yəni bu dəstəyin qarşılığı bu tərbiyəsizlik olmamalıydı..."

KƏNAN BAHADIR