Bilindiyi kimi, yığmamızın DÇ-2026-nın seçmə mərhələsindəki rəqiblərindən biri də Fransadı. Fernando Santuşun rəhbərlik etdiyi komanda "xoruzlar ölkəsi"nin yığmasıyla oktyabrın 10-da səfərdə, noyabrın 16-da evdə qarşılaşacaq.
"Football-plus.az" xəbər verir ki, mediada və sosial şəbəkələrdə Azərbaycan - Fransa matçıyla bağlı maraqlı məlumat yayılıb. İddialara inansaq, AFFA oyunun Gəncə şəhər stadionunda keçirilməsindən yanadı. Bildirilir ki, hələ inşası davam edən idman qurğusu o vaxta qədər tam hazır vəziyyətə gətiriləcək.
Bu xəbərin nə dərəcədə doğru olduğunu öyrənmək məqsədi ilə federasiyanın Mətbuat və İctimaiyyətlə Əlaqələr Departamentinin rəhbəri Elnur Məmmədliyə müraciət etdik. Onun cavabı:
"Oyunun Gəncədə keçirilib-keçirilməyəcəyi ilə bağlı hazırda nəsə demək mümkün deyil. Çünki əvvəlcə stadion hazır olmalıdı. Ondan sonra UEFA nümayəndələri stadiona səfər edib yerində vəziyyətlə tanış olub, arenanı qəbul etməlidilər. Yəni prosedur qaydaları belədi. Hazırda belə bir məsələ gündəmdə deyil".
KƏNAN BAHADIR