Xaricdə işləyən türkiyəli mütəxəssislərin sayı arta bilər.

Belə ki, Türkiyənin tanınmış məşqçilərindən olan Ərtuğrul Sağlama Səudiyyə Ərəbistanından təklif gəlib.

''Football-plus.az'' az xəbər verir ki, bu ölkənin birinci liqa təmsilçisi ''Əl-Ərəbi'' Sağlama 1,5 illik müqavilə və 2,5 milyon dollar maaş təklif edib! 55 yaşlı mütəxəssis düşünmək üçün vaxt istəyib. Sağlam təklifi qəbul etsə, Səudiyyə Ərəbistanında çalışan ikinci türkiyəli mütəxəssisə çevriləcək. Hazırda Fatih Terim də bu ölkədə işləyir. O, elita təmsilçisi ''Əl-Şabab''ın başındadı. Daha bir türkiyəli məşqçi İsmayıl Kartal isə İran təmsilçisi ''Persepolis''i çalışdırır.

Bir dönəm ''Beşiktaş''da da çalışmış Sağlam son illər əsasən aşağı liqa təmsilçilərində işləməyə üstünlük verir. Bu mövsümə o, ''Kocaelispor''un başında başlamışdı. Amma rəhbərliklə fikir ayrılığı yaşadığı üçün dekabrda sürpriz şəkildə istefa verməli olmuşdu. Yəni hazırda 1-ci liqada inamla turnir cədvəlinə başçılıq edən və superliqaya qayıdacağı şübhə doğurmayan Kocaeli təmsilçisinin bu heyətinin təməlini məhz Sağlam qoyub. Təcrübəli mütəxəssis son aylarda həm 1-ci liqa, həm də superliqadan bir neçə təklifi geri çevirib. Deyilənə görə o, mövsümün sonuna qədər heç bir klubun başına keçmək istəmir. Amma Sağlamın Səudiyyə Ərəbistanından gələn bu sərfəli təklifə necə cavab verəcəyi maraq doğurur.

Yeri gəlmişkən, bu məşqçinin artıq vətəndən kənarda çalışmaqla bağlı təcrübəsi də var. Sağlam iki fərqli dönəmdə Təbriz təmsilçisi ''Traktor''u çalışdırıb. ''Əl-Ərəbi''yə gəlincə, 67 illik tarixə malik bu klub elitada yalnız bir dəfə - 1989/90 mövsümündə çıxış edib. Unayza şəhərini təmsil edən bu kollektiv hazırda Səudiyyə Ərəbistanının 1-ci liqasında 26 oyuna topladığı 34 xalla 10-cu pillədə qərarlaşıb.

Sona 8 tur qalmış bu komandanı pley-off zonasından, yəni 6-cı pillədən yalnız 6 xal ayırır.