Bir tərəfdən La Liqa və Çempionlar Liqasında çempionluq mübarizəsi aparan ''Real'' digər tərəfdən gələn mövsüm üçün transfer çalışmalarını davam etdirir.

Bu arada ''Kral klubu''na bir çox dünya ulduzunun təklif edildiyi, amma onların hamısının klub tərəfindən geri çevrildiyi məlum olub.

''Marka'' nəşrinin məlumatına görə söhbət Coşua Kimmix, Leroy Sane, Conatan Ta, Vircil van Diyk, Manuel Akanci və Kevin De Bruyne kimi ulduzlardan gedir. ''Real'' rəhbərliyi bu futbolçuların klub strategiyasına uyğun gəlmədiyini bildirərək bütün təklifləri geri çevirib. Madrid nəhənginin yeni mövsüm üçün danışıqlar apardığı əsas futbolçu ''Liverpul'' və İngiltərə yığmasının sağ müdafiəçisi Trent-Aleksander Arnolddu. Zatən bu oyunçu ilə danışıqlar aparılması çoxdan məlumdu. Arnold özü də ''Real''a yollanmağa can atır və bu mövsüm ''Liverpul''un yeni müqavilə ilə bağlı təklifini bir neçə dəfə geri çevirib.

26 yaşlı futbolçu bu mövsüm 39 rəsmi oyunda 3 qol, 7 məhsuldar ötürməlik performans sərgiləyib.