2023/24 mövsümündə gördüyüm, tanıdığım Ayxan Abbasovla indiki arasında yerdən göyə qədər fərq var.

İndi mütəxəssis çox dəyişib. Təbii ki, söhbət çöhrəsində artan qırışlardan yox, məhz fəaliyyətiylə bağlı irəliləyişdən gedir. Ötən “futbol ili”ndə onun haqda xeyli neqativ düşüncəm var idi ki, bunları “Ayxan Abbasov özünü unutdurmasın” və “Ayxan Abbasovu “şişirtməyin” sərlövhəli yazılarımda diqqətinizə çatdırmışdım. Həmin yazıları yenidən oxudum. Özündən müştəbehlik kimi çıxmasın, mən də o gündən bəri müəyyən mövzularda inkişaf etdiyimi düşünürəm. Hadisələrin təhlili, düzgün baxış bucağı, fikrin daha zəngin ifadələrlə çatdırılması və başqa belə məsələlərdə məsafə qət etmişəm. Lakin Ayxan Abbasov bu gün də həmin cür olsa, yenə haqqında eyni sözləri yazardım. Çünki həmin vaxt “Turan Tovuz”u çalışdıran mütəxəssis qənaətbəxş nəticələr qazanmadığı halda özündən başqa hamını günahlandırır, onu tənqid edənləri qınaq obyektinə çevirir, hətta narazı tovuzlu azarkeşlər haqda da xoşagəlməz ifadələr işlədirdi...

Hər halda, indi hər şey geridə qalıb. O, “Şamaxı”dadı və böyük maliyyə dəstəyi olmayan bölgə təmsilçisinin premyer-liqada qalmasını böyük ölçüdə təmin edib. Komanda sabit nəticələr qazanmaqda çətinlik çəksə də, vacib oyunlarda qızıl dəyərində xalları əldən verməyib. Ayxan Abbasovun yetirmələrinin vacib özəlliklərindən biri də rəqiblər arasında ayrı-seçkilik etməməsidi. Daha doğrusu, “şirlər” meydana güclü və ya zəif rəqib anlayışıyla yox, istənilən komandaya başağrısı olmaq hədəfiylə çıxır. Belədə həm matçın maraqlı keçməsindən zövq alırsan, həm də belə baxımlı oyun göstərən komandadın hansısa bölgəni təmsil etməsindən. Qısası, sadaladığım və uzunçuluq olmasın deyə qeyd etmədiyim məqamlar Ayxan Abbasov haqda fikrimi dəyişib. İş orasındadı ki, məqsədim mədhiyyə yazmaq deyil, hələ hər şeyin qabaqda olduğunu xatırlatmaqdı.

Bilindiyi kimi, Ayxan bəy U-21-in yeni baş məşqçisidi. AFFA ölkənin ikinci yığmasını gənc mütəxəssisin sərəncamına verdi. Artıq yeni çalışdırıcı heyəti də açıqlayıb, futbolçular dünəndən etibarən məşqlərə başlayıb. Komanda bu gün Antalyaa yollanacaq, yəni xoş gələcəyə doğru ilk addımlarını atacaq. Ayxan Abbasov çox çətin vəzifənin öhdəsindən gəlməlidi. Təbii ki, ilk iş Moldova və Şimali Makedoniya ilə yoxlama matçlarında qənaətbəxş nəticələr qazanmaqdı. Sonra gözümüzü Avropa çempionatının seçmə mərhələsinə dikəcəyik. B qrupunda yer alan yığmamızın Portuqaliya, Çexiya, Bolqarıstan, Şotlandiya və Cəbəllütariq ilə mübarizə aparacağından xəbərdarıq. Ayxan Abbasovun əsas işi də məhz burdan başlayır. Daha doğrusu, sentyabrın 5-də Portuqaliyanın qonağı olacağımız matçdan. Əlbəttə, gənclər o vaxta qədər daha bir neçə yoxlama oyunu keçirməli, mütəxəssisin formalaşdırdığı komanda azı uyğunlaşma prosesini uğurla geridə qoymalıdı. Hələ onu demirik ki, böyük ehtimalla, avqustda Misli premyer-liqasının 2025/26 mövsümü başlayacaq və Ayxan Abbasovla müqavilənin müddətini daha bir il artıran “Şamaxı” özünü çempionatı tərk etməmək uğrunda gedən gərgin mübarizənin içində tapacaq.

Bəli, düşünmək olar ki, indi martdı. Hələ fikrimiz təbiətin yenidən canlanmağa başlamasında – güllərin çiçək açmasında, quşların nəğmələrində, havaların xoş keçməyə başlamasındadı. Hələ avqust və ya sentyabrda baş verəcək hadisələr üçün qayğılanmağın vaxtı deyil. Amma futbolumuzun bugünkü durumu nəinki 5-6 ay, 5-6 il sonrasını belə planlamağın vacibliyindən xəbər verir. Əlbəttə, bizim üçün yığmanın “sükanı arxasında” yerli mütəxəssisin olması xoşdu, amma onun özünü doğrultması ikiqat bayram olar və bu amal uğrunda döyüşə nə qədər tez start verilsə, o qədər yaxşıdı.

Abbasov hələ mövsümün əvvəlində yerli məşqçilərə etimad göstərilməməsindən, lazımi dəstəyin verilməməsindən gileylənir, gah “Turan Tovuz”un “bostanına daş atır”, gah da özünün potensialını sərgiləmək üçün meydana ehtiyacı olduğu yönündə mesaj verirdi. Bu sözlərə qədər ona “Şamaxı” qucaq açmışdısa, indi AFFA çox böyük etimad göstərdi. Ayxan bəy Arif Əsədov, Elmar Baxşıyev və Azər Bağırov kimi namizədlərin də olduğu siyahıdan seçildi. Təbii ki, burda onun son aylarda həm mütəxəssis, həm də insan kimi nümayiş etdirdiyi xarakterin də rolu oldu. Ancaq indi məhz gələcəyə köklənmək zamanıdı. Buyurun, meydan sizindi, Ayxan Abbasov!

KƏNAN BAHADIR