Millimiz sabah beynəlxalq yoldaşlıq oyunu çərçivəsində Haitini qəbul edəcək.

"Football-plus.az" xəbər verir ki, yığmamızın baş məşqçisi Fernando Santuş oyunöncəsi mətbuat konfransında iştirak edib və jurnalistlərin suallarını cavablayıb.

- Start heyətini müəyyənləşdirmisiz?
- Bəli, sabah kimlərin ilk "onbirlik"də meydana çıxacağı məlumdu.

- Komandaya yeni dəvət olunan futbolçulara şans veriləcəkmi?
- Adları açıqlaya bilmərəm. Çağırılan futbolçuların bəziləri start heyətində olacaq, bəziləri isə ehtiyat oyunçular skamyasında əyləşəcək.

- Haitiylə matç haqda fikirləriniz necədi?
- Yaxşı komandaya qarşı oynayacağıq. Keyfiyyətli futbolçulara malikdi. Rəqibi analiz etmişik. Məşqlərdə qarşı tərəfin zəif və güclü tərəflərinə əsasən lazım olan hazırlıq işlərini görmüşük. İki hücumçuyla oynayırlar. Komanda yoldaşları daim onlara ötürmə etməyə çalışır. Topu itirsələr də, yenidən qazanmağa, bütün komandayla irəli atılmağa çalışırlar. Müdafiə baxımından zəif nöqtələri də var. Bunlardan yararlanmağa çalışacağıq. Çox yaxşı məşqlər keçmişik. Əhval-ruhiyyə çox yaxşıdı. Əlbəttə, bu oyunlara görə xal verilmir. Lakin qələbə qazanmaq istəyirik. Çox vacib oyundu.

- Haiti millisinin futbolçuları fiziki cəhətdən çox güclüdü. Buna qarşı hansısa tədbir görüləcəkmi?
- İki gün ərzində nəyi dəyişə bilərəm? Kollektiv şəkildə daha güclü çıxış etməliyik. Futbol yalnız fiziki göstəricilərin üzərində qurulmayıb. Taktiki gedişlərdən istifadə etməliyik.

- Millətlər Liqasında Fransayla, yoxsa Xorvatiyayla qarşılaşmaq istərdiz?
- Nəzərə alaq ki, rəqibimiz Haitidi. İndiki durumda həmin matçın nəticəsi o qədər də önəmli deyil. Biz Haitiylə matça köklənmişik.

- İlk dəfə Novruz bayramında Azərbaycanda olduz. İndiyə qədər belə şirin təamlar yemişdiz?
- Dünən yeməklərin dadına baxmağa vaxtım oldu. Azərbaycan Avropanın ən gözəl 20 ölkəsindən biridi. Bura çox təhlükəsiz yerdi və bayramları çox rahat qeyd etmək olur.

- Haitiylə oyuna cəmi 1300 bilet satılıb...
- Premyer-liqa oyunlarını yada salsaq, ən çox azarkeş "Neftçi" - "Qarabağ" oyununda olub. Tribunalarda 9 mindən çox tamaşaçı var idi. İstərdik ki, millinin də oyunlarında çoxlu azarkeş olsun. Amma onları da başa düşmək lazımdı. Qalib gəlməyimizi istəyirlər. Belədə say baxımından artım müşahidə ediləcəyini düşünürəm.

Qeyd edək ki, Mehdi Hüseynzadə adına Sumqayıt şəhər stadionunda keçiriləcək matç saat 21.45-də başlayacaq.

KƏNAN BAHADIR