“UltraSumqayıt” “Sumqayıt”la barışıb...
“UltraSumqayıt”ın “Sumqayıt”la münasibətləri heç də qaydasında deyildi.
Belə ki, azarkeş qrupu dekabrda klubun heç bir yardım etməməsindən gileylənmiş, klubun “Sumqayıt”ın mətbuat xidmətinin rəhbəri Zaur Xudiyev isə məsələni belə anlatmışdı:
“Həmişə “UltraSumqayıt” fanklubu üçün həm ev, həm də səfər oyunlarına görə bilet, nəqliyyat təşkil olunub. Biz bunu hansısa qarşılıq gözləmədən etmişik. Bunu dana bilməzlər. Onlar bir neçə gün əvvəl bəyanat yayaraq bildirdilər ki, müstəqil fanklubdular, heç kimə tabe deyillər. Oyunlara öz hesablarına gəldiklərini dedilər. Var olsunlar, təki həmişə komandamıza dəstək versinlər. Amma bundan sonra “UltraSumqayıt”a hansısa dəstək göstərilməyəcək. Təbii ki, dedikləri kimi, öz hesablarına gəlmək istəsələr, ev oyunlarında onlar üçün sektor ayıra, həmin yerlər üçün olan biletləri yalnız onlara sata bilərik. Səfər oyunlarına da öz hesablarına gələ bilərlər”.
Azarkeş qrupunun dəfələrlə səfər oyunlarında olmadığını diqqətinizə çatdırmışdıq. Deyəsən, vəziyyət dəyişib. Belə ki, “Sumqayıt” “instaqram” hesabında futbolçusu Səbuhi Abdullazadənin milliyə çağrılması ilə bağlı paylaşım edib. Maraqlı məqam odu ki, həmin paylaşımın “şərh” bölməsində fanklubun rəhbəri Qüdrət Allahverdiyev “Turan Tovuz”la səfər oyununa yollanacaqlarını bildirib. Eyni zamanda, fanatlardan heç bir ödənişin tələb olunmadığını söyləyib.
Görəsən, azarkeş qrupu ilə klub arasındakı buzlar əriyibmi? Bu sualı Qüdrət bəyə ünvanladıq:
“Klubla heç vaxt problemimiz olmayıb. Şəhər və klub bizimdi və daim ona dəstəyik. Vaxt, imkan tapdıqca səfər oyunlarına yollanırıq. Ev oyunlarında isə daim komandanın yanındayıq. Hansısa narazılıqdan söhbət gedə bilməz”.
ƏSƏD SEYİDOV
Digər xəbərlər
