A seriyasında ardıcıl 3-cü dəfə uduzmasından sonra “Milan”ın mövsümü Çempionlar Liqasına (ÇL) sonuncu vəsiqəni verən 4-cü yeri tutmaq ehtimalı bir qədər də azaldı.

İtaliya nəhəngi indi ölkə çempionatında bu yerə sahib olan “Yuventus”dan 11 xal geri qalır. Başqa sözlə, Serjio Konseysaonun baş məşqçi vəzifəsinə təyinatı nəticələr planında heç də müsbət effekt vermir. Nəzərə alaq ki, komanda ÇL-də mübarizəni 1/8 finaldan əvvəlki mərhələdə - pley-offda dayandırıb.

Debüt əla alınmışdı
Halbuki ötən ilin son günlərindən birində qeyri-qənaətbəxş nəticələrə görə istefaya göndərilən portuqaliyalı Paulu Fonsekanın yerinə təyinat alan həmyerlisi Konseysaonun “Milan”dakı debütü əla alınmışdı. Komanda yanvarın əvvəlində Səudiyyə Ərəbistanının paytaxtı Ər-Riyadda keçirilən oyunlarda “Yuventus”a 2:1, “İnter”ə 3:2 hesabıyla qalib gəlməklə ölkə superkubokuna sahib olmuşdu. Xüsusilə qeyd edək ki, Konseysao “Milan”ın baş məşqçisi kimi ikinci oyununda titul qazanmışdı. O, 1929/30 mövsümündən sonra komandaya daha az matçda başçılıq etməklə kuboka yiyələnən məşqçi kimi tarixə düşmüşdü. Bu planda əvvəlki rekord 2016-cı ildə baş məşqçi kimi 18-ci oyununda ölkə superkubokunu qazanan Vinçentso Montellaya məxsus idi. Onu da yada salaq ki, Konseysao komandasının uğurunu maraqlı şəkildə qeyd etmiş, 50 yaşlı portuqaliyalı mütəxəssis matçdan sonra paltardəyişmə otağında siqar çəkərək futbolçularla rəqs etmişdi...

Amma yalnız iki oyundan ibarət olan İtaliya Superkubokundakı zəfər milanlıların cari mövsümdəki problemlərini əsla ört-basdır edə bilmədi. Konseysaonun A seriyasındakı debütü “Kalyari” ilə oyuna təsadüf etdi və matç 1:1 hesabıyla nəticələndi. “Komo” üzərində çətinliklə qazanılan qələbədən (2:1) sonra “Yuventus”a məğlubiyyət (0:2) oyun planında çətinliklərin davam etdiyini əyani şəkildə göstərdi. Sonra ÇL-in liqa mərhələsində “Jirona” üzərində qələbə 1:0 Zaqreb “Dinamo”suna məğlubiyyətlə (1:2) müşayiət olundu və komanda əsas mərhələni 8 oyuna 15 xalla 13-cü yerdə başa vurdu. Pley-offda isə “Feyenoord”a iki oyunun nəticəsinə (0:1, 1:1) əsasən məğlubiyyət və avrokubokla vidalaşma qaçılmaz oldu.

Halbuki Fonsekalı “Milan” ÇL-in liqa mərhələsində 6-cı turdan sonra 12 xal toplamaqla ilk 8 yerdən birini tutmaq üçün əla şansa malik idi. A seriyasında 18-ci turdan sonra 17 oyuna 27 xalla 8-ci yerdə olan “qırmızı-qaralar” indiki baş məşqçisi ilə 27 oyuna 41 xalla 9-cu pillədədilər. Deməli, məşqçi dəyişikliyinin komandaya elə bir xeyri dəyməyib.

Futbolçular Konseysaoya “torba tikirlər”?
Yanvarda “Milan”ı dörd oyunçu tərk etdi: müdafiəçi Davide Kalabriya “Bolonya”ya, yarımmüdafiəçi İsmael Bennaser “Marsel”ə, hücumçular Alvaro Morata “Qalatasaray”a, Noa Okafor isə “Napoli”yə icarəyə verildi. Rəhbərlik inadla Yussuf Fofananı “Tottenhem”ə göndərməyə çalışsa da, fransalı yarımmüdafiəçi qətiyyətlə buna razılaşmadı. Komandaya isə müdafiəçi Kayl Uoker (Mançester Siti) və üç hücumçu – Santyaqo Ximenes (Feyenoord), Joao Feliş (Çelsi) ilə Rikkardo Sottil (Fiorentina) gətirildi. İddiaya əsasən, Morata ilə Kalabriya baş məşqçi ilə oyun planında ciddi fikir ayrılığına görə göndərilib. Onların məşqdə Konseysao ilə əməlli-başlı mübahisə etdikləri deyilir. Ən pisi odu ki, belə vəziyyətin davam etdiyi də iddia olunur. Komandanın hücum xəttinin ən vacib oyunçusu sayılan Kristian Pulişiç ilə Fofananın da çalışdırıcı ilə söz savaşına çıxdığı söylənilir. İddiaya əsasən, bu hadisə komanda ÇL-də mübarizəni dayandırandan sonra baş verib. O da deyilir ki, Konseysao məhz buna cavab olaraq Kristianı “Bolonya” ilə oyunda start heyətində meydana buraxmamaqla cəzalandırıb.

Ümumiyyətlə, əksər oyunçuların portuqaliyalıdan narazı olduqları da iddia edilir. Bunun əsas səbəblərindən biri baş məşqçinin onlarla çox sərt davranması göstərilir. İstər-istəməz ağla bu fikir gəlir: bəlkə futbolçular Konseysaoya “torba tikirlər”?..

Baş məşqçi istefa verməyəcək, amma...
Baş məşqçi fevralın 27-də A seriyasında 9-cu turdan təxirə salınan oyunda “Bolonya”ya 1:2 hesablı məğlubiyyətdən sonra jurnalistlərə belə demişdi:

Göründüyü kimi, baş məşqçi istənilən an istefaya yollana biləcəyini deyir. Amma komandanın martın 2-də “Latsio”ya eynihesablı məğlubiyyətindən sonra bu addımı atmayacağını bildirib: “Məşqçilik karyeramda heç vaxt məşq prosesində belə atmosferlə üzləşməmişəm. Komanda hərdən topla davranmağı və dəqiq ötürmə etməyi bacarmır, amma xarakter nümayiş etdirir. Onlar azlıqda oynayaraq hesabı bərabərləşdirdilər, hətta qələbəni də təmin edə bilərdilər, amma son saniyələrdə penaltiyə şərait yaratdıq və uduzduq... Bu vəziyyətdən yeganə çıxış yolu təmsil etdiyimiz rənglər uğrunda mübarizə aparmaqdı. Başa düşmək lazımdı ki, belə çətin vəziyyətdə meydana çıxanda nəyisə idarə etmək daha da çətinləşir. Biz bunun üzərində işləyirik. Komandada texniki cəhətdən güclü futbolçuların olduğuna inanıram. İstefa verməyi düşünürəm? Məni maraqlandıran odu ki, matçdan sonra futbolçuların məyusluğunu görməyim. Bu komandada daha çox işləməyə hazıram. Ona görə də istefa vermək fikrində deyiləm”.
Konseysao öz xoşu ilə getmək istəməsə də, rəhbərlik artıq ona xələf axtarışına başlayıb. Yerli mənbələr mövsümün sonunda onunla yolların hansısa vasitə ilə ayrılmaq ehtimalını çox yüksək dəyərləndirir. “Qazzetta dello Sport”un yazdığına görə hazırda “Komo”nu çalışdıran Fransesk Fabreqas baş məşqçi postuna əsas namizəddi. Konseysaonun yerini hazırda işsiz olan Mauritsio Sarri ilə “Marsel”i çalışdıran Roberto De Zerbi də tuta bilər.

Yeri gəlmişkən...
“Milan”ın ultrası oyunçuları və rəhbərliyi tənqid edən bəyanat yayıb. Fanatların birliyi sayılan “Curva Sud Milano” A seriyasının “Latsio” ilə oyunundan əvvəl etiraz aksiyalarının anonsunu verib və rəhbərliyi klubun strukturunda dəyişikliklər etməyə çağırıb. Ultras klubun transfer bazarında yanvarda deyil, ötən yay fəallıq göstərməli olduğunu qeyd edib. Bu səbəbdən komandanın əsas hədəflərindən artıq mövsümün ilk dövrəsində uzaq düşdüyü vurğulanıb. Ən maraqlısı isə ultrasın bundan sonra matçlara yalnız 15-ci dəqiqədən sonra gəlmək qərarını verməsidi.

Reaksiya
Paolo Di Kanio, “Milan”ın sabiq hücumçusu:

Konseysaolu “Milan”ın nəticələri
turnir rəqib hesab

İtaliya Superkuboku Yuventus 2:1
İtaliya Superkuboku İnter 3:2
İtaliya çempionatı Kalyari 1:1
İtaliya çempionatı Komo 2:1
İtaliya çempionatı Yuventus 0:2
Çempionlar Liqası Jirona 1:0
İtaliya çempionatı Parma 3:2
Çempionlar Liqası Dinamo Z 1:2
İtaliya çempionatı İnter 1:1
İtaliya kuboku Roma 3:1
İtaliya çempionatı Empoli 2:0
Çempionlar Liqası Feyenoord 0:1
İtaliya çempionatı Verona 1:0
Çempionlar Liqası Feyenoord 1:1
İtaliya çempionatı Torino 1:2
İtaliya çempionatı Bolonya 1:2
İtaliya çempionatı Latsio 1:2

RAMİL YUSİFOV