Hər üç İstanbul nəhəngində forma geyən ilk əcnəbi futbolçu kimi adını Türkiyə futbolu tarixinə yazdıran Mişi Batşuayinin Türkiyə macərası bu qış başa çatdı.

Təcrübəli belçikalı forvard 3 milyon avro qarşılığında “Qalatasaray”dan “Ayntraxt”a yollandı. Frankfurt təmsilçisi onun peşəkar karyerasındakı 10-cü fərqli klubdu.

Görəsən, o, “Mançester Siti”yə yollanan “Ayntraxt” fanatlarının sevimlisi Omar Marmuşu layiqincə əvəz edə biləcəkmi?

Hələ ki yeni klubunda qol hesabını aça bilməyən 31 yaşlı forvard “Ayntraxt”ın “Bavariya” ilə səfər oyunundan öncə bundesliqanın rəsmi saytına müsahibə verib.

- Bu qədər müddətdən sonra bundesliqaya qayıtmağa üstünlük verdiz. Nə üçün məhz “Ayntraxt”ı seçdiz?
- Bəli, yenidən bundesliqada oynayacağıma görə sevincliyəm. Frankfurt böyük şəhər, “Ayntraxt” isə böyük klubdu. Bu komanda yetərincə yaxşı mövsüm keçirir. Bu, mənim üçün böyük bir çağırışdı və bu macəramın uğurlu alınacağına ümid edirəm.

- “Ayntraxt”da sizi ilk növbədə nə cəlb etdi?
- Keçmişdə mən həmişə çılğın və mükəmməl azarkeşlərə malik klublarda oynamışam. İnanıram ki, “Ayntraxt” bu tendensiyanı davam etdirmək baxımından düzgün seçimdi. Stadionu, fanatları görəndən sonra düzgün qərar verdiyimə əmin oldum. Fikrimcə, karyeramda yeni macəraya atılmaq, yeni çağırışı qəbul etmək üçün doğru zamandayam. Bu fürsəti qaçıra bilməzdim. Mənim üçün əla seçim oldu.

- “Qalatasaray”dakı karyeranızın son aylarında elə də çox oynamaq imkanınız olmadı. Yəqin ki, İstanbuldan ayrılıb bura gəlməyinizin əsas səbəbi məhz budu...
- Təbii ki, hər futbolçu mümkün qədər çox oynamaq, komandasına yardım etmək və qollar vurmaq istəyir. “Qalatasaray”a yollananda mənə daha çox oynayacağıma söz vermişdilər. Amma bunun belə olmadığını gördük. Burda isə ilk gündən özümə qarşı inam və sevgi hiss etdim. Görürəm ki, baş məşqçi həqiqətən də hər futbolçunun maksimum səviyyəsinə çatmasını istəyir. Bu məqama çox vaxt ayırır və bütün bacarığını ortaya qoyur. Ona görə də belə klubda olduğuma görə xoşbəxtəm.

- 7 il öncə artıq bundesliqada oynamısız. Dortmund “Borussiya”sı ilə bundesliqada 10 oyuna 7 qol vurmusuz. Həmin dönəmi necə xatırlayırsız?
- Bəli, Dortmundda uğurlu dönəm keçirmişdim və çox effektli oynadığımı xatırlayıram. Təəssüf ki, yaxşı başlanğıcdan sonra zədə aldım və bu, hər şeyi korladı. Vəziyyət dəyişdi. Amma bundesliqa üçün darıxırdım. Məhz buna görə də hazırda burdayam. Ümid edirəm ki, fanatlarımıza və kluba çoxlu sevincli anlar yaşadacam.

- Yeri gəlmişkən, “Borussiya”da komanda yoldaşınız olmuş Mario Götse ilə Mahmud Dahud da hazırda “Ayntraxt”dadı. Yeni klubda tanış simaları görmək necə hissdi?
- Onları yenidən görmək mənim üçün xoş oldu. Elə ilk günlərdə burda mənə ən çox yardım edənlər məhz onlar oldu. Amma tək onlar yox, bütün komanda məni isti şəkildə qarşıladı. Burda hər kəsə, ilk növbədə klubun özünə mənə güvəndiyinə görə təşəkkür edirəm. Çünki mənə güvənməsələr, bu transfer baş tutmayacaqdı. Oyunumla bu inamın qarşılığını vermək istəyirəm.

- “Ayntraxt”ın bu mövsüm uğurlu çıxışının baş memarlarından biri Omar Marmuş idi. Onun ayrılmasından sonra məhz siz kluba gəldiz. Bu qədər böyük dəyərə malik olan bir futbolçunun yerinə transfer olunmaq necə hissdi?
- Bu məsələdə belə düşünürəm ki, hər futbolçu öz tarixini yazır. Omar Omardı, mən isə Mişiyəm! Əsas hədəfim, sadəcə, komandanın irəliləməsinə mümkün qədər çox yardım etməkdi. Bunun üçün də ilk növbədə qollar vurmalıyam.

- “Ayntraxt”ın həm də Çempionlar Liqasına vəsiqə qazanmaq ehtimalı var. Bu məqam Frankfurta gəlişinizdə nə dərəcədə rol oynadı?
- Əlbəttə, hər futbolçu ÇL kimi turnirdə oynamaq, o həyəcanı yaşamaq istəyər. Hərçənd düzünü desəm, qərar verərkən bu məqam həlledici rol oynamadı. Digər tərəfdən, hətta ilk məşqdən də komanda yoldaşlarımın nə dərəcədə uğura ac olduqlarını hiss etdim. Məşqdə temp çox yüksək olur. Hər kəs bir-birini daha ürəkdən oynamağa motivasiyalandırır. Burda hər kəs eyni hədəfə köklənib və birlikdə buna nail olmaq istəyirik.

ƏLİ RAUFOĞLU hazırladı