Bu yazını qələmə almağımın səbəbi Misli premyer-liqasının 24-cü turunun “Neftçi” – “Sumqayıt” matçından sonra media nümayəndələrinin önünə çıxan Vaqif Cavadovun söylədikləri deyil.

Baxmayaraq ki, o, “inanıram ki, həm oyunla, həm də hakimliklə bağlı ədalətli təhlillər yazacaqsız. Sizin ədalətli yazılarınızı oxumuşuq. İnanıram ki, yenə belə məqalələr yazacaqsız” ifadələriylə futbol diliylə desək, topu jurnalistlərə ötürdü. İş belədisə, oynayaq Cavadov...

Təbii ki, “Futbol+” nəinki premyer-liqa matçlarını, aşağı liqaları əhatə edən oyunlarda yaşanan ədalətsizlikləri də hərtərəfli işıqlandırmaqda maraqlıdı və imkan daxilində buna çalışır. Oxucularımız da agahdı ki, hər turdan sonra “Hakimlərin mühakiməsi” rubrikasını təqdim edir, məhz ədalət təmsilçilərinin fəaliyyətinə işıq salmağa, qərarları saf-çürük etməyə çalışırıq. Əlbəttə, bu dəfə də ənənəmizə sadiq qalmışıq. Lakin 10 oyuna çatan qələbəsizlik seriyasını və “qol orucu”nu yalnız hakimliyin səviyyəsiylə əlaqələndirmək Vaqif Cavadovun ayıbını örtməkdən başqa nəyəsə yaramayacaq. Onsuz da baş məşqçi özü bunun üçün əlindən gələni əsirgəmir. Onun strategiyası bizə sonda istefa verməyə məcbur qalan xeyli baş məşqçi sayəsində tanışdı.

“Sumqayıt”ın çalışdırıcısı premyer-liqa təcrübəsinə malik olmasa da, biz uğursuzluqların günahını özündən başqa hamıda axtaran xeyli məşqçi tanımışıq. Qısası, Cavadovun tənqidlərin istiqamətini dəyişmək cəhdi yalnız hadisələrin axarından bixəbər şəxslərə təsir edə bilər və biz həmin adamlardan deyilik!

“Kimyaçılar”ın “kimyasını kim pozub”? Vaqif Cavadov üçün burda bir neçə məqam var. O, komandaya müvəqqəti baş məşqçi təyin ediləndə yaşanan uğursuzluqları futbolçuların fiziki hazırlığıyla izah etdi. Ardınca xal ehtiyatını artıran kollektiv avrokuboklar üçün ümid verdi. Burda söhbət mövsümün ikinci yarısında başlayan “qara zolaq” üzündən imkansıza çevrilən arzulardan gedir. Baş məşqçinin növbəti tapıntısı isə dualarla bağlı oldu. Sən demə, kimsə “Sumqayıt”ın qol vurmaması üçün dua edir. Mütəxəssis etiraf etməsə də, bu sözlərlə “Neftçi”yə və baş məşqçisi Samir Abasova söz atdığına şübhə etmirəm. Axı “gənclik şəhəri”nin təmsilçisi sonuncu qələbəsini (2:0) məhz “ağ-qaralar” üzərində qazanıb. Cavadovun növbəti “sığınacaqları” hakimlərin ədalətsiz qərarları, ardından futbolçuların yetərsizliyi oldu.

Hər halda, Vaqif Cavadovun özünü “sığortalamaq” səyləri fayda verə bilməz. Bəy, peşəkar futbolçular, xüsusilə legionerlər ilə işləmək, ildən-ilə gərginliyin artdığı, idman prinsipinin qorunması timsalında mübarizələrin turdan-tura qızışdığı premyer-liqada çalışmaq təcrübəniz varmı? Əlbəttə, istənilən komanda böhran yaşaya, “qara zolaq”la üzləşə bilər. Bəs, siz xaosun idarə edilməsi yönündə bilik və bacarıqlara sahibsizmi? Yəqin ki, xəbərdarsız. Biz jurnalistlərin “Sumqayıt”ın futbolçularıyla danışmaq cəhdlərimiz fayda vermir. Ona görə ki, “kimyaçılar”ın qələbə qazanmadıqca media nümayəndələrinə müsahibə verməsi qadağan edilib. Bəs, sizin oyunçularla, ən əsası, aparıcı və yerli futbolçularla ünsiyyətiniz hansı səviyyədədi? Desəz ki, hansısa problem yoxdu, vallah, inanmaram. Hər fürsətdə qüsurlarını el-aləmə car çəkib onsuz da qaydasında olmayan psixoloji durumunu korladığınız komanda sizə münasibətdə necə səmimi ola bilər?

Təkcə bu məqamlar Vaqif Cavadovun premyer-liqadakı işi ilə bağlı ciddi çatışmazlıqların olduğunun göstəricisidi. Bəli, heyətə yeni cəlb edilən futbolçular özünü yaxşı tərəfdən göstərə bilmir. Məhz bu səbəbdən klubun seleksiya xidmətinin əməkdaşlarını da qınamaq olar. Elə prezident Riad Rədiyevi də. Axı baş məşqçi belə nəticələrə görə məsuliyyət daşıyırsa, rəhbər şəxs yaxasını kənara çəkə bilməz. O da dərhal müvafiq tədbirlər görmədiyinə görə özünü sorğuya çəkməlidi. Məsələn, “böyük şəhərin tək komandası”nı belə qızğın mübarizə şəraitində təcrübəsiz məşqçinin öhdəsinə buraxdığına, öz menecerlik təcrübəsindən heyətin formalaşdırılmasında layiqincə yararlanmadığına görə hərəkətə keçməlidi.

Kəsəsi, reallıqdan qaçmaq olmaz. Vaqif Cavadov bacarmır. Bəli-bəli, təcrübəsi çatmır. Ona verəcəyimiz maksimum dəstək isə yola düşməyin vaxtının çatdığını deməkdi. İnadkarlıq nə “Sumqayıt”a fayda verəcək, nə də mütəxəssisin gələcək karyerasına. İstefa vermək mədəniyyətindən yararlanmaq lazımdı, Cavadov. Hələ tez imiş. Baş məşqçi postunda əyləşmək, Sumqayıt kimi şəhərin futbolunda aparıcı sima olmaq, bu qədər ciddi məsuliyyəti çiyinlərin üzərində danışmaq üçün tez imiş.

“Sumqayıt” təcrübə meydanına çevriləcək qədər kiçik klub, Sumqayıt 1-ci liqaya sığışacaq qədər kiçik şəhər deyil. Böyük şəhərin təcrübə baxımından böyük baş məşqçiyə ehtiyacı var. Siz də bir böyüklük edin!

KƏNAN BAHADIR