“Səbrsizliklə matçın startını gözləyirik” – Teymur Eyvazov Kukseviçi məğlub edəcəyinə inanır
Xəbər verdiyimiz kimi, “Baku Fire” sabah futzal üzrə yüksək liqanın 11-ci turunda “Araz-Naxçıvan”la qarşılaşacaq.
Paytaxt təmsilçisi meydana azı bir xal qazanmaq üçün çıxmalıdı ki, çempionluq uğrunda mübarizə aparan “qırmızı-ağlar”la xal fərqinin azalmasına imkan verməsin. Mümkün qələbə isə bakılıların Muxtar Respublika təmsilçisini 7 xal qabaqlamasıyla nəticələnəcək.
Bəs, komanda belə vacib matça necə hazırlaşır?
Ümumi durum və matçdan gözləntilərlə bağlı fikirlərini öyrənmək üçün “Baku Fire”ın baş məşqçisi Teymur Eyvazova müraciət etdik. Onun “Football-plus.az”a cavabı:
“Güclü rəqiblə üz-üzə gələcəyik. Çox maraqlı və baxımlı oyun olacağını düşünürəm. Yaxşı hazırlıq prosesi keçmişik. Oyuna 4 gün qalmış gündə iki dəfə məşq etməyə başladıq. Bu gün oyunöncəsi son məşqimizi keçirdik. Komandamda əhval-ruhiyyə yüksəkdi. Səbirsizliklə matçın startını gözləyirik. Suares Enrike son qarşılaşmada aldığı zədə üzündən bir neçə gün fərdi məşq etdi. Ümid edirəm ki, sabah meydana çıxmaq üçün tam hazır olacaq. Sarı vərəqələrə görə cəzalı duruma düşən Fərid Abbasov isə bizə yardım edə bilməyəcək”.
Teymur bəy “Araz-Naxçıvan”ın yeni baş məşqçisi Yevgeni Kukseviç haqda bunları dedi:
“Belə güclü mütəxəssisə qarşı mübarizə aparmaq çox maraqlıdı. Bu komandada millimizin üzvü olan futzalçılar var ki, ondan çox şey öyrənəcəklər. Sabah qələbə qazanmaq istəyiriksə, çox çalışmalıylıq. Müdafiə xəttində maksimum dərəcədə diqqətli olmalı, qol imkanlarından istifadə etməliyik. İnanıram ki, bunu bacaracağıq”.
Xatırladaq ki, Bakı İdman Sarayında keçiriləcək matç sabah saat 14.00-da başlayacaq.
KƏNAN BAHADIR
Digər xəbərlər
